Հուլիսի 12-ին Ադրբեջանի զինված ուժերի զինծառայողներն ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ էին կատարել: Հայկական կողմի նախազգուշացումից հետո ադրբեջանցի զինծառայողները, թողնելով ավտոմեքենան, վերադարձել են իրենց դիրք: Ժամը 13:45-ին Ադրբեջանի զինծառայողները կրկնել են հայկական զինված ուժերի սահմանային դիրքը գրավելու փորձը՝ կիրառելով հրետանային կրակ, սակայն ճնշվել են հայկական կողմից և, կորուստներ կրելով, հետ շպրտվել: Երեկոյան ադրբեջանական կողմը վերսկսել էր հրետակոծել Տավուշի նույն դիրքի ուղղությամբ՝ 82 մմ ականանետից և տանկից։ Հուլիսի 13-ի առավոտյան Ադրբեջանը կրկին վերսկսել է հրետակոծել հայկական դիրքերը։ Այս ընթացքում հայկական կողմը կորուստներ չունի, ադրբեջանական կողմը Տավուշի ուղղությամբ 4 զոհի մասին է հայտարարել։
Իրավիճակի հետ կապված ՀԱՊԿ գլխավոր քարտուղար Ստանիսլավ Զասի հետ հեռախոսազրույց է ունեցել Հայաստանի արտաքին գերատեսչության ղեկավար Զոհրաբ Մնացականյանը: Հեռախոսազրույցից հետո հայտնի դարձավ, որ Զասը հրավիրել է ՀԱՊԿ խորհրդի արտահերթ նիստ:
Քաղաքագետ Լևոն Շիրինյանը ողջունում է Զոհրաբ Մնացականյանի քայլն ու արձանագրում՝ նախկինում հայկական կողմը նման քայլի չէր դիմում. «Ոչ էլ ՀԱՊԿ-ն էր արձագանքում, իսկ այժմ իրավիճակ է փոխվել: Բայց այստեղ էլ մի նյուանս կա՝ ադրբեջանցիք խրախուսվեցին Հայաստանի գողապետության պարագլուխների և լրատվական միջոցների կեղծ պատրանքային ներկայացումներից: Սրանք հրահրեցին ընդհարում, ասում էին՝ Հայաստանը թուլացել է, այլևս իրենից ոչինչ չի ներկայացնում և այլն: Փաստորեն քաշեցին Ալիևին, Բագրատյանն ասում էր՝ ես լինեի, կհարձակվեի, ահա և արդյունքը: Սա Ադրբեջանի իշխանությանը հրահրեց, որ անցնեն գործողությունների: Բայց ամեն հարձակում տարածքի կորուստ է տալու իրենց կողմից: Կյանքն ապացուցեց, որ Հայաստանի հեղափոխական բանակը մշտապես պատրաստ է»:
Շիրինյանի դիտարկմամբ՝ Մնացականյանը ճիշտ է, ՀԱՊԿ-ը պետք է պատասխանատվություն ստանձնի. «Հայաստանի գողապետությունն էլ, նրան սպասարկող թերմացքն էլ գործում են Ադրբեջանի իշխանությունների հետ համահունչ: Երկուսն իրար հետ ջախջախվեցին: Իսկապես փայլուն է: Հեղափոխական իդեալները, հեղափոխական բանակը ի վիճակի է ցանկացած գործողություն կատարելու: Քանի որ իրենք ոռնում են, թե հեղափոխություն չի եղել, բայց հայտնի չէ՝ եթե չի եղել, ինչո՞ւ են իրենք ճահճում: Սխալվեցին՝ Հայաստանն ուժեղանում ու ժողովրդավարանում է և նոր բարձունքներ նվաճում: Արդյունքները կերևան առաջիկայում: Շնորհավորում եմ թե՛ մեր զինվորներին, թե՛ գողապետության թերմացքին, մեկին՝ հաղթանակի, մյուսին՝ տապալման համար: Շնորհավորում եմ մեր վարչապետին, ցավակցում Ալիևին, Հասանովին և Հայաստանի իրենց անձնական օգտագործման սպասարկուներին»,- եզրափակեց նա:
Քաղաքագետ Ռոբերտ Ղևոնդյանի կարծիքով՝ ՀԱՊԿ-ի քաղաքականության մեջ որոշակի փոփոխություն է տեղի ունեցել: «Առաջին հերթին դա կապում եմ նրա հետ, որ Հայաստանում ՀԱՊԿ-ի հետ կապված կա ընդհանուր դժգոհություն: Եթե տեսնենք քաղաքական ուժերի հայտարարությունները, ապա շատերն այդ մասին ուղղակի արտահայտվել են, նշել են, որ նույնիսկ սպասումներ չունեն ՀԱՊԿ-ից: ՀԱՊԿ-ն, այսպիսով, առաջին հերթին, ցանկացել է ցույց տալ, որ Հայաստանի քաղաքական ուժերի մտահոգությունները տեղին չեն, ու այն գործուն կառույց է»,- «Առաջին լրատվական»-ի հետ զրույցում ասաց նա:
Մեր զրուցակցի դիտարկմամբ՝ ՀԱՊԿ-ն այժմ ունի այլ գլխավոր քարտուղար, և վերջինս հավանաբար իր մասին ընդհանրապես հայտարարելու առիթ ունի և օգտագործում է այդ առիթը. «Կտեսնենք, թե ինչպիսի զարգացումներ կլինեն, բայց ամեն դեպքում ՀԱՊԿ-ի ակտիվացումը բխում է Հայաստանի անվտանգային շահերից, և եթե Հայաստանը կարող է օգտագործել այդ հարթակն իր անվտանգության համար, ապա այն Հայաստանի ընդհանուր արտաքին քաղաքականության վրա դրական ազդեցություն կունենա»: