Այս տարվա ամռանը Իսպանիայի կառավարությունը հազարավոր ոստիկաններ կուղարկի խոշոր հանգստավայրեր`սանիտարական կանոնները վերահսկելու համար:
Այս մասին հաղորդում է The Local-ը:
Ավելի քան երկու շաբաթ է անցել այն բանից հետո, երբ Իսպանիան վերաբացեց իր սահմանները Շենգենյան այլ երկրների զբոսաշրջիկների համար, բայց երկրի բազմաթիվ հանգստավայրեր կիսով չափ դատարկ են:
Զբոսաշրջիկները զգուշանում են ճանապարհորդել մի երկիր, որը կորոնավիրուսի բռնկման եվրոպական կենտրոններից մեկն է եղել:
Դա Իսպանիայի կառավարությանը դրդել է գործարկել երկու համատեղ արշավ՝ «Գործողություն Ամառ» և «Անվտանգ տուրիզմի ծրագիր»՝ նպատակ ունենալով «երաշխավորել ամառային սեզոնի պաշտպանությունը և համախմբել Իսպանիան», որպես մոլորակի ամենաապահով տուրիստական վայրերից մեկը»:
«Այդ նպատակով պատրաստվել են քսանից ավելի ուղեցույցներ, որոնք ընդգրկում են ամբողջ տուրիստական ցանցը և հանդիսանում են ուղեցույց գլոբալ ինդեքսի համար»,-ասել է Իսաբել Մարիա Օլիվեր Սագրեասը՝ Իսպանիայի զբոսաշրջության հարցերով պետքարտուղարը:
Անվտանգության այս միջոցառումների ապահովման համար Ազգային ոստիկանության և քաղաքացիական գվարդիայի լրացուցիչ 40 000 սպաներ կուղարկվեն Իսպանիայի ամենատարածված տուրիստական շրջանները՝ Անդալուսիա, Աստուրիաս, Բալեարյան կղզիներ, Կանարյան կղզիներ, Կանտաբրիա, Վալենսիա, Գալիցիա, Մադրիդ և Մուրսիա:
Աշխատակիցները զբաղվելու են քաղաքային և միջքաղաքային երթուղիների, կայարանների, նավահանգիստների, օդանավակայանների, հյուրանոցների, լողափերի և ճամբարների ուժեղացված հսկողությամբ և կանխարգելիչ վերահսկողությամբ:
Նրանք նաև կապահովեն, որ բնակիչները և զբոսաշրջիկները համապատասխանեն յուրաքանչյուր մարզում իրականացվող առողջապահական միջոցառումներին, ինչպես, օրինակ, Բալեարյան կղզիներում վերջին պահանջն է հասարակական վայրերում պարտադիր դիմակ կրելը:
