Հանրապետությունում մեկնարկել է ծիրանի մթերման գործընթացը։ Այս տարի ծիրանի մթերմամբ զբաղվող խոշոր ընկերությունների մեկը՝ «Արարատի Աբրիկոն» ՍՊԸ-ն, ծիրան չի մթերելու։ «Առաջին լրատվական»-ի հետ զրույցում ընկերության հիմնադիր Կարեն Խաչիկյանը տեղեկացրեց, որ իրենց ընկերության իրացման ծավալները մոտ 5 անգամ նվազել են։ Պատճառը կորոնավիրուսային համավարակով պայմանավորված իրավիճակն է։
«Դժբախտաբար, այս տարի ծիրան չենք մթերելու։ Այս տարին բաց ենք թողնելու։ Քանի որ մենք ապրանքը հիմնականում տարբեր երկրների դութի ֆրիներ էինք ուղարկում, դրանք հիմա փակ են, պատվերներ չկան, հին պատվերների գումարները դեռևս չենք կարողանում ստանալ, դրա համար որոշեցինք այս տարի ընկերությանը ավելի մեծ բեռի տակ չդնել։ Մեծ քանակությամբ պաշարներ ունենք։ Որոշեցինք այս տարի իզուր տեղը ընկերությանը մեծ «նագրուզկայի» տակ չմտցնենք, քան որ հայտնի չէ, թե դեռ ինչքան կշարունակվի տնտեսական այս վիճակը։ Ամբողջ աշխարհում է նույն վիճակը»,- ասաց Կարեն Խաչիկյանը։
Ընկերության ղեկավարի խոսքով՝ կորոնավիրուսի համավարակի պատճառով իրենց ապրանքի իրացման ծավալների շատ լուրջ նվազում է եղել, ֆինանսական մուտքերն էլ մեծ չեն, հետևաբար ծիրանի նոր քանակի մթերման անհրաժեշտություն ու հնարավորություն չկա։
Իրացման ծավալների կրճատումը դեռևս չի անդրադարձել ընկերությունում աշխատատեղերի կրճատման վրա, սակայն, տնօրենի խոսքով, չի բացառվում, որ հուլիսից սկսեն կրճատումներ կատարել։ «Հուլիսի 1-ի դրությամբ կրճատում տեղի չի ունեցել։ Բայց չի բացառվում, որ որոշակի կրճատումներ կանենք։ Փորձել ենք պահել անձնակազմը։ Բայց կրճատումները չեն բացառվում»,- ընդգծեց «Աբրիկոն» ընկերության տնօրենը։
«Արարատի Աբրիկոն» ընկերությունը նախորդ տարի մթերել է 700-1500 տոննա ծիրան։ Մեր զրուցակցի փոխանցմամբ՝ ընկերության ֆինանսական վիճակի բարելավման նպատակով իրենք դիմել էին արտահանմանն ուղղված աջակցության ծրագրի, որի պատասխանը պետք է մինչև ապրիլի 15-ը ստանային, սակայն կորոնավիրուսի համավարակի պատճառով հետաձգվեց պատասխանը։ «Վերջին նամակը, որը գրել ենք, պատասխանը օգոստոսի 1-ին են ասելու, սակայն այդ ժամանակ արդեն ծիրան չի լինի»,- նշեց Խաչիկյանը։
«Արարատի Աբրիկոն» ընկերության ղեկավարը, սակայն, լավատես է, չի կարծում, թե սա աշխարհի վերջն է. «Նախ՝ ամբողջ աշխարհում է այս նույն իրավիճակը։ Տնտեսություններն անկում են ապրում։ Միայն Հայաստանը չէ։ Պետք է դիմանանք, մինչև ամեն ինչ նորից վերականգնվի։ Ուրիշ տարբերակ չկա։ Հույսներս պետք է դնենք, որ բժշկությունն ինչ-որ բան կմտածի, այս վտանգի աստիճանը կթեթևանա, և մարդիկ կկարողանան առաջվա նման ապրել»։
Նշենք, որ «Ագրարագյուղացիական միավորում» ՀԿ նախագահ Հրաչ Բերբերյանը մեզ հետ զրույցում նշել էր, որ այս տարի ծիրանի բերքն այնքան առատ չէ, որ մտահոգվենք արտահանման կամ մթերման խնդրով։ ՀՀ-ից ծիրանի արտահանման հիմնական շուկաները Ռուսաստանն ու Վրաստանն են։ Բերբերյանի խոսքով՝ այս տարի Արմավիրում, Արարատում, որոնք համարվում են ծիրանի շտեմարան, մեղուները լավ չեն աշխատել։ Բերքի մթերման կամ արտահանման առումով ոլորտի մասնագետը դեռևս խնդիր չի տեսնում։
