Լուրեր
Հրայր Թովմասյանին պետք է արգելել ՍԴ շենք մտնել. նա ոտնձգություն է կատարել ՀՀ ինքնիշխանության նկատմամբ

Իրավական տիրույթում նոր զարգացումների և ոլորտում առկա խնդիրների շուրջ «Առաջին լրատվական»-ի հետ քննարկմանը մասնակցեցին «Քաղաքացիական պայմանագիր» կուսակցության հանրային կապերի պատասխանատու Վահագն Ալեքսանյանը, ՀԱԿ իրավական հանձնաժողովի ներկայացուցիչ Արմեն Խաչատրյանը և իրավապաշտպան Նինա Կարապետյանցը:

Բարձրագույն դատական խորհուրդը որոշեց մերժել Վերաքննիչ դատարանի դատավոր Ալեքսանդր Ազարյանին կարգապահական պատասխանատվության ենթարկելու վերաբերյալ արդարադատության նախարար Բադասյանի միջնորդությունը, ի դեպ, սրան կողմ էին բացառապես դատավորները, ինչը ևս քննարկման առարկա էր դարձել: ՀՔԾ-ն Ալեքսանդր Ազարյանին այսօր կրկին բարեվարքության կոչ է արել:

Վերջերս բավականին շատ է շոշափվում նաև ԲԴԽ-ի հարցը այն առումով, որ ԲԴԽ-ն դարձել է կոռումպացված դատավորների կաստայի տանիք: Անդրադառնալով այս դիտարկմանը՝ Նինա Կարապետյանցը նշեց. «Ե՞րբ էր դադարել, որ հիմա էլ դարձել է… Դատավոր Ազարյանի վարքագիծը ակնհայտորեն անհարգալից է, սակայն ԲԴԽ-ն արդարացնում է նրան… ԲԴԽ-ի խնդիրը նոր չէ, հին է, խորքային բարեփոխումների, այդ թվում նաև վեթինգի, լյուստրացիայի և քաղաքական գնահատական տալու անհրաժեշտություն կա, այսամենը չի արվել, ինչը բերելու է տխուր հետևանքների: Սա սպասելի իրավիճակ է»:

Հայաստանում բուռն տարածում է ստացել ՄԻԵԴ-ի որոշումը, որով մերժվել է Սահմանադրական դատարանի նախկին նախագահ Հրայր Թովմասյանի և հայտնի սահմանադրական փոփոխություններով հեռացվող դատավորների միջանկյալ միջոց կիրառելու պահանջը՝ այն է՝ Սահմանադրության փոփոխության կասեցումը… Այն շրջանակները, ովքեր սատարում են ՍԴ նախկին նախագահին և ՍԴ նախկին անդամներին, պնդում են, որ իշխանության կողմից մանիպուլացվում է ՄԻԵԴ-ի հայտնի փաստաթուղթը: Արմեն Խաչատրյանի խոսքով՝ ակնհայտ է, որ ՄԻԵԴ-ի այս որոշումը այլ բան չի լինելու, քան այն մեսիջը, որ ուղարկել էին՝ մենք ձեր ինքնիշխանության կամ անկախության նկատմամբ ոտնձգություն չենք կարող կատարել:

«ՍԴ անդամները խնդրել էին միջամտել և կասեցնել մեր երկրի գործող Սահմանադրության դրույթներից մեկը, ինչը ՄԻԵԴ-ը չէր անի ոչ մի գնով: Սա հիմք է, որ Հրայր Թովմասյանին ոչ թե պետք է լեգիտիմացնել որպես ՍԴ դատավոր, այլ նրան պետք է արգելել ՍԴ շենք մտնել: Սա արդեն երկրորդ դեպքն է, որ նա ոտնձգություն է կատարել ՀՀ ինքնիշխանության նկատմամբ: Առաջին անգամ նա իր ֆեյք թարգմանությամբ Բուքիքիոյին վերագրում էր գործողություն, որը նա, վստահ եմ, չէր արել. այսինքն՝ Թովմասյանը սխալ թարգմանությամբ նշել էր, որ Բուքիքիոն հանձնարարական է տվել մեր սուվերեն պետության բարձր դատարանին կամ խորհրդարանին: Հրայր Թովմասյանն արդեն երկրորդ դեպքն է, որ փորձում է միջազգային դատարանի աջակցությամբ կասեցնել ՀՀ Սահմանադրության որևէ դրույթ: Հրայր Թովմասյանի նկատմամբ պահանջերը պետք է փոխվեն, պետք է լինի հրաժարականի պահանջ, կամ նոր ձևավորվող ՍԴ-ն պետք է վարույթ սկսի նրա նկատմամբ՝ այս երկու գորողությունների հիմքով»:

Մանրամասն՝ տեսանյութում:

  • Դիտումներ՝ *