Սերբիայի իշխանությունները հրաժարվել են կորոնավիրուսով պայմանավորված պարետային ժամ մտցնելու գաղափարից այն բանից հետո, երբ Բելգրադում և երկրի մի շարք այլ քաղաքներում սահմանափակումների դեմ ուղղված բողոքի ակցիաները վերաճել են հակակառավարական ցույցերի, հայտնում է BBC-ն:
Վարչապետ Անա Բրնաբիկը հայտարարել է, որ նախատեսվող պարետային ժամի փոխարեն իշխանությունները կարգելեն տասից ավելի անձանց զանգվածային հավաքները:
Պաշտոնական տվյալներով, Սերբիայում հայտնաբերվել է կորոնավիրուսային վարակի 17.342 դեպք: Հունիսի վերջին դեպքերի թիվը կտրուկ աճել է: Հուլիսի 7-ին նախագահ Ալեքսանդր Վուչիչը հայտարարել է խիստ կարանտինի և պարետային ժամի վերադարձի մասին՝ ձեռնարկությունների փակմամբ և հինգից ավելի անձանց հավաքների արգելմամբ: Վուչիչը շեշտել է, որ Սերբիայի մայրաքաղաք Բելգրադում իրավիճակը կրիտիկական է, և որ քաղաքի հիվանդանոցները գերծանրաբեռնված են:
Ի պատասխան, հուլիսի 7-ին հազարավոր ցուցարարներ են հավաքվել Բելգրադի կենտրոնում՝ իրենց անհամաձայնությունը հայտնելով կրկին խիստ կարանտին սահմանելու իշխանությունների որոշմանը և պահանջել են Վուչիչի և կառավարության հրաժարականը:
Հուլիսի 7-ի լույս 8-ի գիշերը ցուցարարները ներխուժել են խորհրդարան: Ոստիկանները արցունքաբեր գազ և լուսաձայնային նռնակներ են կիրառել: Ընդհանուր առմամբ, մայրաքաղաքում տեղի ունեցած բախումների ժամանակ վիրավորվել է 43 ոստիկան և 17 ցուցարար, ևս 23 մարդ ձերբակալվել է: Հաջորդ օրը բողոքի ցույցերը շարունակվել են:
Սերբիայի նախագահ Ալեքսանդր Վուչիչը մեղադրել է օտարերկրյա հատուկ ծառայություններին անկարգություններին մասնակցության մեջ և չեղյալ է հայտարարել Ռուսաստանի դեսպանի հետ հանդիպումը: