Միացյալ Նահանգների Հետաքննությունների դաշնային բյուրոյի (ՀԴԲ) գործակալները ստուգումներ են սկսել չինացի գործարար Գո Վենգույի և ԱՄՆ նախագահի նախկին օգնական Սթիվեն Բենոնի նկատմամբ: Այս մասին հաղորդում է The Wall Street Journal-ը՝ աղբյուրներին հղումով:
Նշվում է, որ ՀԴԲ-ն և Նյու Յորքի դատախազությունը մտադիր են պարզել, թե ինչ ճանապարհով է չինացի միլիարդատերը ստացել այն գումարները, որոնք նա հետագայում ներդրել է ամերիկյան մի շարք լրատվամիջոցների ֆինանսավորման գործում: Հոդվածում նշվում է, որ ստուգումները շարունակվում են արդեն վեց ամիս:
Թե ինչու է հենց չինացի գործարարը հայտնվել հատուկ ծառայությունների ուշադրության կենտրոնում, պարբերականը չի պարզաբանում:
Հայտնի է, որ Վենգույը Չինաստանից փախել է ԱՄՆ 2014թ.-ին, հայրենիքում նա մեղադրվում է կոռուպցիայի և իր արտասահմանյան հաշիվներին միջոցների ապօրինի փոխանցման մեջ: Նա նաև բազմիցս հանդես է եկել Պեկինի քննադատությամբ:
Բենոնը 2016թ.-ին բարձր պաշտոն է զբաղեցրել Միացյալ Նահանգների գործող նախագահ Դոնալդ Թրամփի նախընտրական շտաբում: Հետագայում նա նշանակվել է Սպիտակ տան վարչակազմի գլխավոր ռազմագետի պաշտոնում: 2017թ.-ի օգոստոսին նա լքել է պաշտոնը:
WSJ-ի փոխանցմամբ, Բենոնը նախագահի թիմը լքելուց հետո դարձել է Վենգույի հետ կապված Guo Media ընկերության խորհրդատուն: 2018թ.-ին նախկին քաղաքական գործիչը մեկ տարի ժամկետով պայմանագիր է կնքել, որի համաձայն նա պետք է 1 միլիոն դոլար ստանար: Բենոնը պետք է հարաբերություններ ստեղծեր ընկերության և հայտնի անձանց միջև, պայմանագիրը չի երկարաձգվել:
Հայտնի է, որ Բենոնը և Գո Վենգույը լրատվամիջոցներում համատեղ արշավ են իրականացրել, որի ընթացքում նրանք կոչ են արել հետաքննություն սկսել չինացի մի շարք պաշտոնյաների նկատմամբ: