Լուրեր
Կան բազմաթիվ պատվաստանյութեր։ Խոսքը վերջնական հաստատում ստանալու մասին է. Արսեն Թորոսյան
  • 12:37
  • 2020-07-09
  • Դիտումներ՝ *

Այս ընթացքում ծավալել ենք ռեկորդային թվով թթվածնային կետով 1488 մահճակալ, ինչը շատ կարևոր է կորոնավիրուսի բուժման առումով։ Այս մասին կառավարության նիստի ժամանակ ասաց ՀՀ վարչապետ Նիկոլ Փաշինյանը։

Վարչապետը կարևորեց նաև վերակենդանացման բաժանմունքների ստեղծումը. «Ցավոք սրտի աշխարհի միտումներն այնպիսին են, որ դեռևս չկա որևէ տվյալ, որ այս համաճարակը գնալու է անկման։ Իհարկե մենք Հայաստանում պետք է առավելագույնն անենք՝ դա իրականացնելու համար, բայց պետք է հասկանանք, որ աշխարհից կտրված չենք»,-ասաց Նիկոլ Փաշինյանը։

Վերջինս նկատեց՝ քանի որ ամբողջ աշխարհը սպասում է պատվաստանյութի, մարդիկ գոյություն չունեցող, սակայն սպասվող պատվաստանյութի համար հերթ են կանգնում և կան երկրներ, որոնք ըստ էության արդեն իրականացրել են գնում. «Այսինքն գումար են փոխանցել և ահռելի քանակությամբ այդ ապագա գնումը ձեռք են բերել, ինչը մտավախություն է առաջացնում, որ պատվաստանյութի ստեղծման պահից, խմբաքանակներն ամբողջությամբ կհայտնվեն մի քանի երկրների տրամադրության տակ։ Մեխանիզմներ են մտածում, թե ինչ անել, որ դա տեղի չունենա»,-ասաց Նիկոլ Փաշինյանը։

ՀՀ առողջապահության նախարար Արսեն Թորոսյանն էլ ասաց, որ իրականում պատվաստանյութ կա. «Կան բազմաթիվ պատվաստանյութեր։ Խոսքը վերջնական հաստատում ստանալու մասին է։ Ավելին, կան ընկերություններ, որոնք տասնյակ հազարներով արտադրել են, որ շարունակեն կլինիկական փորձարկումները։ Այստեղ խոսքը միայն հաստատում ստանալուց հետո արագ բաշխման մասին է, այլ ոչ թե այդ ապրանքների լինել-չլինելու։ Դրանք շատ են և ամենայն հավանականությամբ վերջնական հաստատումը լինելու է ոչ մեկը, այլ մի քանիսը»,-ասաց նախարարը։

  • Դիտումներ՝ *