Լիտվայի ռադիոյի և հեռուստատեսության հանձնաժողովը արգելել է RT-ի ալիքների հեռարձակումը՝ ԵՄ պատժամիջոցների տակ գտնվող ռուս պրապագանդիստ Դմիտրի Կիսելյովի հետ կապերի պատճառով: Այս մասին հաղորդում է «Եվրոպեյսկայա պրավդա»-ն՝ Delfi-ին հղումով:
«ԱԳՆ-ի տեղեկատվության հիման վրա, Լիտվայի ռադիոյի և հեռուստատեսության հանձնաժողովը որոշել է Լիտվայի Հանրապետության տարածքում դադարեցնել RT-ի հինգ ալիքների հեռարձակումը»,- ասել է հանձնաժողովի նախագահ Մանթաս Մարտիշյուսը:
Նրա խոսքով, որոշումն ուժի մեջ է մտնում առցանց հրապարակման պահից, այսինքն՝ հինգշաբթի:
Ըստ հանձնաժողովի, Լիտվայում ցուցադրվում է RT ցանցի հինգ ալիք՝ RT, RT HD, RT Spanish, RT Documentary և RT Documentary HD:
Ռուսական RT ալիքների ցանցը, որը նախկինում կոչվում էր Russia Today, ավելի վաղ արգելվել է Լատվիայի էլեկտրոնային լրատվամիջոցների ազգային խորհրդի կողմից:
