Մամուլի ազգային ակումբի հյուրն այսօր «Սարդարապատ» շարժման ներկայացուցիչ Ժիրայր Սեֆիլյանն էր, ով իր խոսքում մասնավորապես անդրադարձավ Հայաստանում այս ամռանը քաղաքական առանձնահատկություններին ու դրանց հնարավոր զարգացումներին:
Նրա խոսքով՝ նախորդ տարիների համեմատությամբ շատ բան չի փոխվել, քանի որ քաղաքական դաշտ իր տրամաբանական իմաստով չի ձևավորվել: «Չգիտես ինչու ամռանը քաղաքական գործիչներն իրենց իրավունք են վերապահում գնալ արձակուրդի: Դա արդարացված կլիներ, եթե հաջողած լինեինք քաղաքական կյանքում, եթե իրավիճակը սարդարապատային չլիներ»,- ասաց Ժ.Սեֆիլյանը՝ ավելացնելով, որ մեծ հաշվով դա զավեշտալի երևույթ է:
Նրա խորին համոզմամբ՝ քաղաքական դաշտի տերուտնօրենը ներկա ռեժիմն է, որի պարագլուխը Սերժ Սարգսյանն է ու այն, ինչ կատարվում է քաղաքական դաշտում, դրանից պետք չէ որևէ լավ բան ակնկալել:
«Ռեժիմը կեղեքել ու շարունակում է կեղեքել մեր ժողովրդին: Մեր առաջարկն է՝ իրադրությունը դուրս բերել ճահճից, ձևավորել դաշտ, որտեղ ռեժիմի պարագլուխները զրկված կլինեն իրենց գործիքներից»,- ասաց նա՝ հավելելով, որ «Սարդարապատ» շարժումն այս 1-1.5 տարում զբաղված է այդ դաշտի ձևավորմամբ:
Ըստ նրա՝ մոտ ապագայում կձևավորվի մի երրորդ ուժ, որը կառաջնորդի մեր ժողովրդին ու նրան դուրս կբերի այդ «անելանելի վիճակից»: «Ժամանակը եկել է՝ գտնելու լուրջ և ազնիվ մարդիկ, որոնք պատրաստ են զոհաբերությունների, որոնց գործն ու խոսքն իրարից չի տարբերվում: Նման մարդկանցով պետք է իրականացվի այլընտրանքային ուժի ձևավորումը»,- համոզված նշեց Սեֆիլյանը՝ հավելելով, որ մենք գտնվում ենք դասական հեղափախական պայքարի նախաշեմին:
Անդրադառնալով ՀԱԿ-իշխանություն երկխոսությանը, նա նշեց, թե այդ «գործի ղեկավարը» Սերժ Սարգսյանն է, իսկ Լևոն Տեր-Պետրոսյանն առաջին անգամ չէ, որ ցանկություն է հայտնել երկխոսելու: «Արդեն երեք տարի է»,- ասաց նա՝ ընդգծելով այն փաստը, որ Սերժ Սարգսյանը բնավ էլ պատահականորեն չի ընդունել երկխոսության հրավերը:
Նրա կարծիքով՝ խորհրդարանական ընտրություններին ընդառաջ նախագահը երկխոսությամբ ցանկություն ունի փոշիացնել Լ.Տեր-Պետրոսյանի շուրջ համախմբված մոբիլիզացված ժողովրդին: «Օր օրի մոբիլիզացված ժողովրդի թիվը պակասում է ու դա հօգուտ ընդդիմության չէ»,- նշեց վերջինս: