Թուրքիայի նախագահ Ռեջեփ Թայիփ Էրդողանը հրահանգել է Ստամբուլում 6-րդ դարում Բյուզանդիայի կայսր Հուստինիանոսի օրոք կառուցված Սուրբ Սոֆիայի տաճարը վերածել մզկիթի և զրկել թանգարանի կարգավիճակից։
Կոստանդնուպոլսի Հունաց Տիեզերական պատրիարք Բարդուղիմեոս Ա-ն, անդրադառնալով այդ որոշմանը, նշել է, որ Սուրբ Սոֆիան թանգարանի կարգավիճակով կարող է ծառայել որպես ժամանակակից աշխարհում չափազանց կարևոր քրիստոնեության և իսլամի փոխըմբռնման և համերաշխության, ժողովուրդների և մշակույթների հատման, երկխոսության և խաղաղության մեջ համակեցության խորհրդանիշ։ Պոլսո Հայոց պատրիարքը որևէ մտահոգություն չունի Էրդողանի որոշման հետ կապված։ Այդ մասին «Առաջին լրատվական»-ի հետ զրույցում ասաց Ստամբուլի «Ակօս» շաբաթաթերթի հայկական բաժնի խմբագիր Բագրատ Էստուկյանը։
«Մաշալյանը որևէ դժգոհություն չի հայտնել, ավելին՝ ասել է, որ նախընտրում է զբոսաշրջիկների՝ տաճարում աջ ու ձախ վազելու փոխարեն հավատացյալներ գան, այսինքն՝ Մաշալյանն ի նպաստ Էրդողանի է խոսում, փորձում է նրան հաճոյանալ։ Մինչդեռ աշխարհի քրիստոնյա հոգևորականները հակառակ կարծիքի են»,- ասաց Բագրատ Էստուկյանը։
Նրա խոսքերով՝ եթե Թուրքիայի կառավարությունը որոշել է նման քայլի դիմել, նրան դիմադրել անհնար է։ «Նրանք ասում են, որ սա իրենց անկախության երաշխիքն է, ասում են՝ մեր երկրի մեջ ինչ ուզում ենք, անում ենք, և որ ոչ ոք իրավունք չունի միջամտել։ Սպասենք, տեսնենք՝ ինչ որոշում կկայացնի Էրդողանը, ամեն բան կախված է Էրդողանի կամքից»,- հավելեց Էստուկյանը։
Նա նշեց, որ ակնկալիք չկա, որ Հայաստանը որևէ կերպ կարձագանքի այս հարցին․ «Ընդհանրապես, Հունաստանում ավելի շատ հոգևորականներն են խոսում, քան քաղաքական գործիչները այս խնդրով, որևէ քրիստոնյա չպետք է ուզի, որ այն մզկիթի վերածվեր։ Էրդողանի այս ծրագիրը վաղուց էր։ Նա միշտ փոթորիկ է փորձել ստեղծել, նա խնդիրներ ունի թե՛ Իսրայելի, թե՛ Հունաստանի, թե՛ Կիպրոսի հետ, այնպես որ, Էրդողանը այս բոլոր ճակատներում ամրապնդում է իրեն, խնդիրներ է հարուցում և, կարծես թե, ազգայնականությունը վառ պահելու միտում ունի, ինչպես նաև կրոնամոլների աջակցությունն է փորձում այս քայլով ունենալ»։
Ի դեպ, այս կոթողը 934 թվականին, թուրքական կառավարության որոշմամբ, թանգարանի է վերածվել: