Ադրբեջանական Trend լրատվական գործակալության փոխանցմամբ՝ ԵՄ-ը մտադիր է գազի փոխադրման երթուղիների հարցում պայմանավորվել Ադրբեջանի ու Թուրքմենստանի հարցում։ Այս մասին հայտարարել է Եվրահանձնաժողովի էներգետիկ դեպարտամենտը։
Այս կապակցությամբ բանակցությունները մեկնարկելու են սեպտեմբերին։ Էներգետիկ գծով եվրակոմիսար Գյունթեր Օթթինգերի ներկայացուցիչ Մառլեն Հոլցները նշում է. «Ադրբեջանի կամ մեկ այլ երկրի բարձրաստիճան պաշտոնյաների հետ բանակցություններ վարելու համար Եվրահանձնաժողովին մանդատ է հարկավոր։ Սեպտեմբերին կտրամադրվի այդ մանդատը, և Եվրահանձնաժողովը կկարողանա նմանատիպ բանակցություններ վարել։
Դրանք կարող են ամիսներ ձգձգվել։ Դրանք դեռևս չեն մեկնարկել, ինչի համար էլ ավելորդ է դեռ դրանց արդյունքների մասին խոսելը։ Դրանց նպատակը ԵՄ-ի և Ադրբեջանի ու Թուրքմենստանի միջև գազի փոխադրման հարցում պայմանավորվածության ձեռք բերումն է։
Հայտնի չէ, թե ինչպես է գազը Թուրքմենստանից հասնելու Ադրբեջան, ապա նաև Եվրոպա։ Սեպտեմբերին միայն կմեկնարկեն այդ բանակցությունները»։
Հիշեցնենք, որ ավելի վաղ նշվում էր, թե Ադրբեջանը ԵՄ-ի համար առաջնահերթ համարվող Nabucco գազատարին միանալու վերաբերյալ իր պատասխանը ներկայացնելու է հոկտեմբերի վերջին։