Թուրքիայի իշխանությունների՝ Սուրբ Սոֆիայի տաճարը մզկիթի վերածելու մտադրությանն է անդրադարձել Աթենքի արքեպիսկոպոս Իերոնիմոսը։ Ըստ նրա՝ թուրքական կողմի այդ նախաձեռնությունը պարզապես խաղ է և իրականում Թուրքիան չի համարձակվի նման բան անել։
Սուրբ Սոֆիայի տաճարի շուրջ ձևավորված իրավիճակին են արձագանքել Հունաստանի տարածքային հոգևոր առաջնորդներից՝ մետրոպոլիտներից որոշները ևս։ Ռեթիմնոյի մետրոլոպիտ Եվգենիոսը հայտարարել է, որ Սուրբ Սոֆիան իրականում պետք է վերականգնի եկեղեցու իր կարգավիճակը։
Նա նաև հավելել է, որ իրենք աղոթում են, որպեսզի կառույցը շարունակի գործել որպես թանգարան։
«Մաղթում եմ, որպեսզի նախագահ Ռեջեփ Թայիփ Էրդողանը գործի Ղուրանի և համաշխարհային մշակութային ժառանգության պահպանման նորմերին համապատասխան։ Ինչ նպատակով էլ որ Սուրբ Սոֆիան իր պատմության ընթացքում շահագործված լինի, այն միևնույնն է, եկեղեցի է մնում», այսպիսի հայտարարություն է տարածել Լանգադա շրջանի մետրոպոլիտ Իոաննեսը։
Հույն հոգևորականներն ընդգծել են նաև, որ Սուրբ Սոֆիայի տաճարի կարգավիճակի փոփոխությունը դժգոհության մեծ ալիք կառաջացնի ողջ աշխարհի քրիստոնեական համայնքում։
Իսկ Հունաստանի Պելոպոնես թերակղզու Պատրաս քաղաքի եկեղեցիներից մեկում 4 ժամանոց պատարագ է մատուցվել, որպեսզի Սուրբ Սոֆիան չվերածվի մզկիթի։
