Վերջին շրջանում Հայաստանում որոշ ուժեր ու սուբյեկտներ գուժում են Հայաստանում հայ- ռուսական հարաբերությունների սրման մասին: Գագիկ Ծառուկյանի հայտնի հայտարարությանը հաջորդեցին համանման հայտարարություններ, ինչը վկայում է, որ ձևավորվել է թրենդ՝ Հայաստանում տեղի ունեցող զարգացումները ներկայացնել որպես հակառուսական տրամադրություններ: Արդյո՞ք սա Ռուսաստանին անվերապահորեն ծառայելու առաջարկ է, պատրաստակամություն, որի մասին հայտնում են հայաստանյան քաղաքական որոշ շրջանակներ:
Թեմայի շուրջ «Առաջին լրատվական»-ի հետ քննարկմանը այս և մի շարք այլ հարցերի շուրջ իրենց դիտարկումները ներկայացրին վերլուծաբան Մհեր Ղալեչյանը, «Հայ կառուցողական կուսակցության» գլխավոր խորհրդի քարտուղար Դավիթ Հովհաննիսյանը և «Քաղաքացու որոշում» կուսակցության գործադիր մարմնի անդամ Գոռ Հակոբյանը:
«Ժամանակն է, որ խնդիր դրվի, քննարկվի և հստակեցվի, թե մեր ռազմավարական դաշնակցի հետ հարաբերություններում որոնք են մեր շահերը, որոնք են հակասությունները, ինչքան մենք պետք է կարողանանք պահպանել մեր ինքնուրույնությունը և դրսևորել տարբեր հարցերում՝ հաշվի առնելով նաև անվտանգության հետ կապված հարցերը»- նշեց Գոռ Հակոբյանը:
Դավիթ Հովհաննիսյանի խոսքով՝ Հայաստանում սկզբունքորեն պետք է վերանայվեն Հայաստանի և ՌԴ-ի միջև հաստատված հարաբերությունները. «Մենք ժառանգել ենք վասալային հարաբերություններ: Այդ հարաբերությունները պետք է վերանայվեն: Բայց, իմ կարծիքով, Ռուսաստանի համար Նիկոլ Փաշինյանի կառավարությունը կոմֆորտ գործընկերություն է: Մենք հեղափոխությունից հետո ՌԴ-ի հետ ավելի լավ հարաբերություններ ունենք՝ նույն սկզբունքով, ինչ որ եղել է նախկինում, ՌԴ-ի ցանկությունները Հայաստանում իրականացվում են: Հակադրություններ չկան ՀՀ և ՌԴ կառավարությունների միջև: Հայ-ռուսական հարաբերություններում գլոբալ փոփոխություն, ի շահ Հայաստանի, չի եղել»:
Մհեր Ղալեչյանի դիտարկմամբ՝ հայ-ռուսական հարաբերությունների մասին շեփորահարող քաղաքական ուժերի համար այդ հարաբերություններն առաջնային չեն. «Այդ ուժերի, մասնավորապես Գագիկ Ծառուկյանի հայտարարությունը հավատարմության երդում է: Նրանք ապավինում են դրսի ուժերին»:
Քննարկման մասնակիցների կարծիքով՝ որոշ ուժերի պայքարը մեկ գաղափարի շուրջ է՝ տապալել իշխանությունը, և սա փակում է իրական ընդդիմության դաշտը:
Մանրամասն՝ տեսանյութում: