Մինչև հիմա Երուսաղեմի հայ համայնքում կորոնավիրուսով ոչ մի վարակված չկա, որովհետև հայկական թաղամասը մեկուսացման, կարանտինի մեջ են պահում: Այդ մասին «Առաջին լրատվական»-ի հետ զրույցում նշեց Երուսաղեմի Հայոց պատրիարքության դիվանապետ Կորյուն վարդապետ Բաղդասարյանը:
Նրա խոսքերով՝ նույնիսկ այն ժամանակ, երբ վարակվածների օրական թիվը շատ իջել էր, իրենք կարանտինից դուրս չեկան, շարունակեցին կարանտին պահել: «Ընդհանուր առմամբ, հիմա, այո՛, թիվը բարձրացել է: Առաջին ալիքի ժամանակվա թվերից էլ անցել ենք, այսօր արդեն օրական վարակվածների քառանիշ թիվ է արձանագրվում: Կառավարությունը նախկին սահմանափակումները վերականգնել է, մասնավորապես, արգելվում են հավաքները, որտեղ 20 հոգուց ավելի մարդ կա, իսկ փակ տարածքներում չի կարելի 4 հոգուց ավելի մարդկանցով հավաքվել: Նաև վարչապետի կողմից առաջարկություն է արվել, որ մեծ առևտրի կենտրոնները, ռեստորանները, ծովափները փակվեն: Այդ առաջարկությանը դեմ է ֆինանսների նախարարը, որովհետև նա ասում է, որ վերջին 1 ամսվա ընթացքում հազիվ կարողացել են վերականգնել տնտեսական վնասը, որ մարդիկ ստացել են համընդհանուր սահմանափակումների պատճառով: Կարծում եմ՝ քննարկումների արդյունքում, հավանաբար, ծովափների գործունեությունը որոշակի ժամերի կթույլատրվի, ռեստորանները կգործեն որոշակի սահմանափակումներով»,- ասաց Հայր Կորյունը:
Նա հավելեց, որ այս պահին հիվանդության նահանջի միտում չկա, թվերը վերջին օրերին անցել են հազարից. «Ամեն դեպքում կառավարությունը բոլոր խստացումներն արել է, 10 օր առաջ դիմակ չկրելու համար տուգանքը 200 շեքելից բարձրացրել են 500 շեքել (մոտ 70 հազար դրամ): Կառավարությունն ամեն ինչ անում է, որ վարակվածների թիվը նվազի, բայց այս պահի դրությամբ թիվն աճում է»:
Հարցին, թե մարդիկ հետևո՞ւմ են կանոններին, Հայր Կորյունը պատասխանեց. «Ընդհանուր հետևելով իրավիճակին, տեսնում ենք, որ խոցելի խմբի ներկայացուցիչներն ավելի ուշադիր են, խստորեն պահում են կանոնները, իսկ երիտասարդներն այդքան խիստ չեն հետևում: Նույնիսկ նոր տերմին է առաջացել՝ կորոնավիրուսի երիտասարդացում, այսինքն՝ եթե առաջին ալիքի ժամանակ առավել շատ տարիքով մարդիկ էին վարակվում, ապա վերջին շրջանում խոցելի խմբի անձինք պահում են կանոնները, և երիտասարդներն են ավելի շատ վարակվում»: