Իրանում կորոնավիրուսով վարակվածների թիվը հասել է 243.051, վերջին մեկ օրում կորոնավիրուսից մահացել է 160 հոգի։ Այդ մասին «Առաջին լրատվական»-ի հետ զրույցում ասաց Թեհրանում լույս տեսնող «Արաքս» շաբաթաթերթի խմբագիր Մովսես Քեշիշյանը։
Երեկվանից մինչև այսօր՝ հուլիսի 6-ը, Իրանում հաստատվել է կորոնավիրուսով վարակման 2.613 նոր դեպք, որոնցից հոսպիտալացվել են 1468-ը: Անցած 24 ժամվա ընթացքում կորոնավիրուսից մահացել են 160 հոգի, ընդհանուր թիվը՝ 11.731:
Քեշիշյանը տեղեկացրեց, որ մինչ այժմ 204.083 հիվանդ ապաքինվել և դուրս է գրվել: Այս պահին 3.201 հիվանդ գտնվում է ծանր վիճակում: Մինչ այս պահը երկրում թեստավորվել է 1,820,003 հոգի:
Երկրի 31 նահանգներից 9-ը՝ Խուզեստան, Քրդստան, Հորմոզգան, Բուշեր, Խորասան Ռազավի, Իլամ, Քերմանշահ ու Արևմտյան և Արևելյան Ատրպատական նահանգները, գտնվում են կարմիր գոտում: Իսկ նահանգներից 6-ը՝ Գոլեստան, Ալբորզ, Համադան, Յազդ, Քերման, Սիստան և Բելուչեստանը, ահազանգային վիճակում են:
Մովսես Քեշիշյանը նաև տեղեկացրեց, որ իրանահայ համայնքում մեկ հոգի ևս մահացել է կորոնավիրուսից, համայնքում մահացածների ընդհանուր թիվը 19 է։
«Թեհրանում կորոնավիրուսից մահացածը 54-ամյա հայուհի է: Հարազատները մահվան պատճառի մասին իմացել են միայն մահվանից հետո անցկացված թեստերից: Հանգուցյալը որևէ խրոնիկ հիվանդություն չի ունեցել»,- ասաց նա։
Հուլիսի 5-ից Իրանում դիմակ կրելը պարտադիր է, մանավանդ հանրային երթևեկության միջոցներում և հանրային փակ վայրերում։ Հարսանյաց սրահները նորից փակվել են կորոնավիրուսի նոր թափով տարածման պատճառով։