Մանկապիղծ Ջեֆրի Էփշթեյնի հանցակիցը և ընկերուհին՝ բրիտանուհի Գիլեյն Մաքսվելը, որն ավելի վաղ կալանավորված էր Միացյալ Նահանգներում՝ անչափահասների մարմնավաճառության և սեռական շահագործման կազմակերպման կասկածանքով, կարող է ցուցմունք տալ արքայազն Էնդրյուի դեմ, գրում է The Times պարբերականը:
Բրիտանացի լրագրող Նայջել Քոութորնը, որը գիրք է գրել արքայազնի և Մաքսվելի հետ էփշթեյնի բարեկամության մասին, պարբերականին հայտնել է, որ կինը կարող է գործարքի գնալ հետաքննության հետ: Նա հայտարարել է, որ ճնշման տակ կալանավորը կարող է հաստատել, որ Եղիսաբեթ II-ի որդին սեռական կապ է ունեցել այն աղջիկների հետ, որոնց Էփշթեյնը ստիպել է մարմնավաճառությամբ զբաղվել:
Քոութորնի խոսքով, ԱՄՆ դատախազությունը վատագույն դեպքում կարող է հեռակա կարգով մեղադրանք առաջադրել արքայազն Էնդրյուին և Բրիտանիայից պահանջել արտահանձնել նրան: Նա ասել է, որ հակառակ դեպքում արքայազնը կարող է ներգրավվել որպես վկա: Լրագրողը նշել է, որ անկախ հետաքննությանն օգնելու արքայազն Էնդրյուի մերժումից կամ համաձայնությունից, երկու դեպքում էլ նա ծայրաստիճան անհարմար դրության մեջ է հայտնվելու:
Ավելի վաղ հայտնի էր դարձել, որ Մաքսվելին արդեն մեղադրանք է առաջադրվել մի քանի կետերով: Նրան մինչև 35 տարվա ազատազրկում է սպառնում:
