Քաղաքական և հանրային նոր իրողությունների պայմաններում մեզ անհրաժեշտ է նոր ոստիկանություն՝ առաջնահերթ դրա բովանդակային իմաստով։
Ունենալով հին բազան, ինչպե՞ս ենք մենք դրա վրա կառուցելու նոր, բարեփոխված ոստիկանություն․ «Առաջին լրատվական»-ի հարցին «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը պատասխանեց․ «Պարեկային ծառայության մասին խոսելիս երևի ուղղակի պետք է մոռանալ այն ամենը, ինչ մենք ունենք, որովհետև այն ամբողջությամբ նոր է ստեղծվում։ Առայժմ այս ամենը թղթի վրա է, բայց շուտով պրոցեսները կսկսեն։ Հաջորդ շաբաթ ոստիկանությունը պետք է տա հայտարարություն պարեկային ծառայության ծառայողների հավաքագրման առումով։ Այդտեղ կարող են լինել թե՛ ոստիկանության ծառայողները, թե՛ ոստիկանության ծառայող երբեք չհանդիսացած անձինք։ Այդտեղ լինելու է լուրջ ընտրություն։ Այսինքն՝ այնպես չի լինելու, ինչպես ոստիկանությունում են ինչ-որ մեկին նշանակում աշխատանքի, լինելու է բոլորովին այլ կերպ։ Պարեկային ոստիկանություն դիմելուց հետո նախ լինելու է փաստաթղթերի ստուգման փուլ, որը տեխնիկական փուլ է։ Այնուհետև լինելու է բժշկական հանձնաժողովի փուլ, որի ժամանակ պետք է համոզվեն, որ դիմողները չունեն առողջական խնդիրներ։ Հաջորդը լինելու է ֆիզիկական պատրաստվածության քննություն՝ տեսնելու են, որ մարդիկ իսկապես ֆիզիկապես պատրաստ են։ Դրանից հետո լինելու է թեստավորում, որը լինելու է համակարգչով ու մարդու կողմից մասնակցություն չի լինելու։ Վերջում լինելու է հարցազրույցի փուլը, որը որոշակի առումով ամենակարևորն է։ Հարցազրույցի փուլում լինելու է նաև հոգեբան, լինելու են տարբեր գերատեսչությունների ներկայացուցիչներ՝ ոստիկանության, արդարադատության նախարարության, կրթության և գիտության նախարարության, ինչպես նաև տարբեր հասարակական կազմակերպությունների ներկայացուցիչներ։ Ըստ էության՝ հարցազրույցի փուլում էլ որոշվելու է, թե տվյալ անձը կծառայի՞, թե՞ ոչ։ Բայց մինչ այդ նրանք ոչ թե գնալու են ծառայության, այլ հատուկ կուրս են անցնելու, այն շատ է տարբերվելու այն կուրսերից, որոնք այսօր կան ոստիկանության ակադեմիայում։ Դրանից հետո մոտ 7-8 հարյուր մարդ նոր կանցնի ծառայության»։
Իսկ «Քաղաքական երկխոսություն» ՀԿ համահիմնադիր Արամայիս Ավետիսյանն էլ ասաց․ «Նախ ասեմ, որ ես դեմ եմ ոստիկանության բարեփոխումների վերաբերյալ ֆրագմենտալ քննարկումներին։ Մանավանդ որ դա կտրվում է հասարակական, քաղաքական կյանքի իրողության կոնտեքստից։ Ոստիկանությունում ցանկացած փոփոխության մասին խոսելիս պետք է նկատի ունենալ, որ դա միասնական մի ամբողջական համակարգ է, ու հասարակության խնդիրը չի եղել ոստիկանության առանձին ստորաբաժանման հետ, այլ այն եղել է համակարգային, գլոբալ, որովհետև այդ ոստիկանությունն է տարիներ շարունակ ճնշել հասարակությանը»։
Մանրամասները՝ տեսանյութում։