«Առաջին լրատվական»-ի զրուցակիցն է «Սասնա ծռեր» համահայկական կուսակցության քարտուղարության համակարգող Վարուժան Ավետիսյանը:
– Պարոն Ավետիսյան, ԲՀԿ առաջնորդ Գագիկ Ծառուկյանը հայ–ռուսական հարաբերություններին առնչվող նամակ է տարածել և նշել, որ կանի ամեն ինչ` կանխելու մեր երկրում հակառուսական տրամադրությունների ստեղծմանը նպատակաուղղված սադրանքները: Ի՞նչ դիտարկումներ ունեք, արդյո՞ք փորձ է արվում Ռուսաստանը ներքաշել ներքաղաքական պրոցեսների մեջ:
– Ռուսաստանը ներքաշված է Հայաստանի ներքաղաքական կյանքում, այդպիսի բաներ ասող ուժերն էլ Ռուսաստանի շահերի սպասարկողներն են: Նորություն չէ և, բնականաբար, մեր՝ որպես ժողովրդի, որպես սուվերենի թիվ մեկ խնդիրն է ինքնամաքրվել, որպեսզի կարողանանք վերջապես ինքնիշխան պետություն ստեղծել: Երբ խոսում էինք լյուստրացիայի անհրաժեշտության մասին, այդ թվում՝ քաղաքական, գործակալական, խոսում էինք այն մասին, որ պետք է անցումային արդարադատություն լինի, որ դավաճան ու նախկին ռեժիմների մաս կազմած կուսակցությունների, նրանց պարագլուխների գործունեությունն արգելվի, այդ ամենը ընդունվեց: Ընդհակառակը՝ նրանց հետ գործարքներ տեղի ունեցան, այսօր ահա, խնդրեմ, պատկերը սա է: Մեզ կանգնեցնում են պետականության ճգնաժամի առաջ այս շրջանակները, դրանցից պետք է Հայաստանն ու Հայաստանի քաղաքական դաշտը հնարավորինս ազատել, ձևն էլ արդեն ասացի:
– Ի՞նչն է պատճառը, որ Ռուսաստանն այդքան ցավոտ է ընդունում մեր ներքին, ինքնիշխան որոշումներ կայացնելը, օրինակ, հայկական մուլտիպլեքսում փոփոխություններ կատարելը, ՌԴ ընդդիմադիր գործիչ Նավալնուն եթերաժամանակ հատկացնելը։
– Պարզ պատճառով: Ըստ էության, տասնամյակների ընթացքում նրանք տեղական խամաճիկների ձեռքով զավթել են մեր երկիրը, մեր պետությունը զավթված է, գործող իշխանությունների ձեռքին իրական լծակներ կլինեն այն ժամանակ, երբ անցումային արդարադատություն ու լյուստրացիա կիրականացվի: Եվ սա վերաբերում է ցանկացած իշխանությանը: Հակառակ դեպքում՝ խորքային պետությունն իր ԱԱԾ-ով, կեղծ խամաճիկ կուսակցություններով, գործիչներով, քաղաքագետ կոչված վերլուծաբաններով պայքարելու են մեր ազգի ու պետության դեմ: Նրանք սովոր են, որ անգամ շնչելուց պետք է իրենցից թույլտվություն վերցնենք, և երբ այդպես չի լինում, իրենք, կարելի է ասել՝ բարկանում են, անհանգստանում ու նեղվում են:
– Կարծում եք՝ այդ ուժերի վերջնանպատակը Ռուսաստանի աջակցությամբ ՀՀ գործող իշխանություններին հեռացնե՞լն է:
– Հայաստանում տեղի ունեցած փոփոխություններից անմիջապես հետո, այսինքն՝ 2018 թվականի ապրիլի 23-ից՝ Սերժ Սարգսյանի հրաժարականից հետո, այդ պլանը մտավ գործողության մեջ: Բնականաբար, հետզհետե թափ են հավաքում այդ ուժերը գործող իշխանության՝ ժողովրդի կողմից տված հեղափոխության մանդատն ի կատար չածելու պատճառով: Պարզ է, որ հինգերորդ շարասյունը կարծում է, թե պահը մոտենում է, երբ իրենք պետք է վերջնական քայլ կատարեն: Այսպիսի հայտարարություններն ու գործողությունները մոբիլիզացիայի նախապատրաստական աշխատանքի անհրաժեշտ մասն են կազմում:
