Վերջին մի քանի ամիսներին հաքերական մի քանի խմբեր անընդհատ հարձակումներ են գործում հայտնի կայքերի, այդ թվում՝ ամերիկյան պետական կայքերի վրա: Սակայն այս չարիքի դեմ պայքարը դեռ բավարար արդյունավետ չէ, ինչի հետևանքով բավական մեծ քանակությամբ գաղտնի և անձնական տեղեկություններ հայտնվում են հաքերների ձեռքում:
Ինչպես հաղորդում է Reuters գործակալությունը, երեկ հրաժարական է տվել ԱՄՆ ներքին անվտանգության նախարարության համակարգչային վտանգի արագ արձագանքման ծառայության ղեկավար Ռենդի Վիքերսը: Հրաժարականը ներկայացվել է ուրբաթ օրը, սակայն դրա մասին տեղեկությունները տարածվել են երկուշաբթի, երբ ծառայության որոշ աշխատակիցներ ստացել են Վիքերսի հրաժարականի մասին էլեկտրոնաին ծանուցումներ:
Պաշտոնական հաղորդագրություն այս կապակցությամբ չի ստացվել, և հայտնի չեն հրաժարականի պատճառները, սակայն որոշ վերլուծաբաններ ասում են, որ Վիքերսի հրաժարականը հաջորդել է մի շարք խոշոր հաքերական հարձակումներին: Վերջինը հուլիսի 11-ին էր, երբ Anonymous խմբի հաքերները կոտրել են Booz Allen Hamilton ընկերության սերվերը, որն աշխատում է ԱՄՆ պաշտպանական գերատեսչության հետ։ Դրա հետևանքով գողացվել են այդ գերատեսչության մոտ 90 հազար աշխատակիցների էլեկտրոնային հասցեները: