Լուրեր
Ծառուկյանի վերջին հույսի ակցիան. նապաստակը եկել ասում է՝ արջին բան ասող կա՞

ԲՀԿ նախագահ Գագիկ Ծառուկյանը հայտարարել է, որ Հայաստանում սրվում են հակառուսական տրամադրություններ, պահանջում են հանել Գյումրիի ռուսական ռազմակայանը, ու քանի որ դա մեր թշնամիների երազանքն է, ինքը, որպես երկրորդ ուժի ղեկավար, ամեն ինչ անելու է հակառուսական տրամադրությունները կանխելու համար: Ծառուկյանը կոչ է անում նաև ամեն կերպ խորացնել ինտեգրացիան Հայաստանի և Ռուսաստանի միջև՝ տարբեր ձևաչափերով:

Եվ Ծառուկյանը միակը չէ, որ այսպիսի կարծիքի կողմնակից է: Հանրային հեռուստատեսության՝ Նավալնու մասնակցությամբ հայտնի ռեպորտաժից հետո խորհրդարանական և արտախորհրդարական որոշ ուժեր գուժում են, որ սեպ է խրվում հայ-ռուսական հարաբերությունների մեջ:

Թեմայի շուրջ Առաջին լրատվականի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, վերլուծաբան Գոռ Մադոյանը և «Հանուն Հանրապետության» նախաձեռնության անդամ Ռոբերտ Ղևոնդյանը:

Հայաստանում գործող քաղաքական ուժերը պետք է իրենց համար, հանրության առաջ շատ հստակ սահմանեն, թե որ պետության շահերի և ինքնիշխանության դաշտում են իրենք խաղում: Անդրադառնալով այս դիտարկմանը՝ Ազատ Արշակյանը նշեց. «Պետք է հստակեցնեն, թե ում շահերի ագենտն են, բայց մենք գործ ունենք այլ երևույթի՝ վերջին հույսի ակցիայի հետ: Ինչպես ֆուտբոլիստն է ձեռքով խաղալով՝ պահպանում դարբասը, և դրան հաջորդում է տուգանային հարվածը, հիմա մենք գործ ունենք այդպիսի երևույթի՝ վերջին հույսի հետ. արջը ռազբորկա է անում, և նապաստակն ուշացած գալիս է, ասում՝ արջին բան ասող կա՞: Գագիկ Ծառուկյաը ոչ թե Ռուսաստանին է պաշտպանում հայերից և Հայաստանում, այլ ինքն արդեն դիմում է Ռուսաստանին՝ ասելով ինձ պաշտպանեք, ես պաշտպանության կարիք ունեմ: Ծառուկյանն ամեն ինչ արել է իրեն պատասխանատվությունից փրկելու համար, և վերջինը հենց այն է, որ նա հայտարարեց, թե Ռուսաստանի պաշտպանն է Հայաստանում: Մենք գիտեինք, որ նա Ռուսաստանի ագենտն է, և հիմա երբ հայտարարում է այդ մասին, նա բարձրաձայնում է՝ իմ շահերը չեն համընկնում Հայաստանի շահերի հետ, իմ և Հայաստանի ժողովրդի շահերը հակասական են: Սա Ծառուկյանի կողմից փրկության աղաղակ է:

Ռոբերտ Ղևոնդյանի խոսքով՝ այդ դրսևորումներին կա մեկ պատասխան, ՀՀ-ն ինքնիշխան պետություն է և չի խառնվում այլ երկրի ներքին գործերին. «Հայ-ռուսական հարաբերությունները չեն կարող կախված լինել տարբեր երկրներում տարբեր գործիչների մոտեցումների մասին հեռարձակումից: Այսինքն, այն բոլոր դերակատարները, որոնք գուժում են հայ-ռուսական հարաբերություններում խնդիրների մասին, ունեն սեփական շահերը»:

Գոռ Մադոյանի խոսքով՝ այդ բոլոր «անհանգստացած» ուժերի նպատակը մեր պետության, հասարակության և իշխանության ձախողումն է և իրենց խաղաքարտը ավելի վատի՝ ապոկալիպտիկ տրամադրությունների մասին գուժելն է.«Նրանք փորձում են ոչ միայն խնդիրներ գտնել, այլ նաև ստեղծել»:

 

Մանրամասն՝ տեսանյութում:

  • Դիտումներ՝ *