Հայտնի հեռուստամեկնաբան Վլադիմիր Սոլովյովը քննադատել է Հայաստանին՝ Հանրային հեռուստատեսության եթերում ընդդիմադիր Ալեքսեյ Նավալնիի հայտնվելու պատճառով։
«Մենք այդքան սիրում ենք Հայաստանը, որը մեզ համար բարեկամական երկիր է: Բայց մեր բարեկամ երկրի Հանրային հեռուստատեսության եթերում սահմանադրական փոփոխությունների վերաբերյալ ռեպորտաժում ցույց են տալիս նացիստ Նավալնիին, մի մարդու, ով ատում է Հայաստանը, ատում է հայերին և արհամարհաբար նրանց «խաչեր» անվանում։ Եվ դուք՝ Հայաստանի Հանրային հեռուստատեսություն, եթե՞ր եք տրամադրում այդ մարդուն…»,- ասել է Սոլովյովը։
Ռուսաստանի հայերի միության պաշտոնական կայքէջում հրապարակվել է «Հայաստանի հանրային հեռուստատեսության հակահանրային և հակահայկական ակնհայտ էությունը» վերնագրով հաղորդագրությունը:
«Հայաստանի Հանրային հեռուստաընկերության եթերը հայտնի հայաֆոբ Նավալնիին տրամադրելը ոչ այլ ինչ է, քան մտածված հակահայկական ակցիա` ուղղված Ռուսաստանի կյանքում հայերի կառուցողական դերը և հայ-ռուսական դաշնակցային հարաբերությունները կասկածի տակ դնելուն:
Մեր կարծիքով՝ Հայաստանի ղեկավարությունը պետք է իր գնահատականը տա հարկ վճարողների միջոցներով գոյություն ունեցող հեռուստաընկերության եթերում իր մեկնաբանություններով հայաֆոբ Նավալնու հայտնվելուն (որը հայերին ծաղրանքով «խաչ» է անվանում և այլն), որը վերջերս «փառավորվել» էր նաև Հայրենական մեծ պատերազմի վետերանի մասին վիրավորական արտահայտություն անելով: Մենք համոզված ենք, որ Ռուսաստանի հայկական համայնքում արդարացի դժգոհության ալիք բարձրացրած նման սադրանքների պատվիրատուներին և կատարողներին չի հաջողվի հանրային գիտակցության մեջ հակառուսական հռետորաբանություն արմատավորել, առավել ևս փոխել հայ-ռուսական բարեկամական և դաշնակցային հարաբերությունների զարգացման վեկտորը»,- ասված է միության հաղորդագրությունում: