Իմ կարիերայի ողջ ընթացքում երբևէ իշխանությանը չեմ ներկայացրել իմ թեկնածությունը կամ չեմ առաջարկել ծառայություններ՝ սկսած նախագահ Տեր-Պետրոսյանի ժամանակներից: Այս մասին «Առաջին լրատվական»-ի հետ զրույցում նշեց արդարադատության նախկին նախարար, Վրաստանում Հայաստանի նախկին դեսպան Հովհաննես Մանուկյանը՝ անդրադառնալով այսօր մամուլում եղած այն հրապարակմանը, որ վերջինս գործադիրին առաջարկել է ՍԴ դատավորի իր թեկնածությունը:
Հիշեցնենք, որ այսօր Lragir.am-ը գրել էր, որ իր ունեցած տեղեկություններով՝ գործադիրին դատավորի իրենց թեկնածությունն են առաջարկել արդարադատության նախկին նախարար, Վրաստանում Հայաստանի նախկին դեսպան Հովհաննես Մանուկյանը, նախկին ՄԻՊ Կարեն Անդրեասյանը և արդարադատության նախկին նախարար Արտակ Զեյնալյանը։ Ի դեպ, Զեյնալյանին իշխանությունը ընդհուպ ՍԴ նախագահ է առաջարկել, վերջինս, սակայն, դեռ վերջնական պատասխան չի տվել։
Մանուկյանի խոսքով՝ յուրաքանչյուր իրավաբանի համար մեծ պատիվ է ծառայել բարձր դատարանում՝ լինի դա Սահմանադրական դատարանը կամ Վճռաբեկ դատարանը: «Սակայն հարկ եմ համարում հայտնել, որ դատական համակարգը, արդարադատության ոլորտը վաղուց դուրս են իմ հետաքրքրությունների շրջանակից։ Առավել ևս՝ ժամանակին ես պատիվ եմ ունեցել ղեկավարելու Վճռաբեկ դատարանը և ներկայացնելու ողջ դատական համակարգը»,- ասաց նա՝ հավելելով. ««Լրագիր» կայքի հրապարակման առիթով կասեմ ընդամենը մեկ բան. իմ կարիերայի ողջ ընթացքում երբևէ իշխանությանը չեմ ներկայացրել իմ թեկնածությունը կամ չեմ առաջարկել ծառայություններ՝ սկսած նախագահ Տեր-Պետրոսյանի ժամանակներից։ Ստացված առաջարկներն էլ ընդունել կամ մերժել եմ՝ ելնելով կոնկրետ պաշտոնում իմ գործունեության արդյունավետության չափանիշից»։