ՀՀ նախագահ Արմեն Սարգսյանը Սահմանադրական դատարանին վերաբերող օրենքը չի ստորագրի։ Վերջինս այդ մասին արդեն իսկ տեղեկացրել է ԱԺ նախագահ Արարատ Միրզոյանին:
Հիշեցնենք՝ հունիսի 22-ին ԱԺ-ն ընդունեց Սահմանադրության մեջ փոփոխությունների փաթեթը, որն ուժի մեջ մտավ հունիսի 26-ին։ Դրանով Սահմանադրական դատարանի գործող նախագահը պաշտոնանկ է արվում ու շարունակում աշխատել որպես ՍԴ անդամ, իսկ ՍԴ երեք անդամները, որոնք այդ պաշտոնում աշխատել են 12 տարուց ավելի, ուղարկվում են թոշակի:
Քաղաքագետ Լևոն Շիրինյանը, ով մշտապես բարձրաձայնում էր ՍԴ հարցը խորհրդարանում լուծելու տարբերակը, «Առաջին լրատվական»-ի հետ զրույցում անդրադարձավ նախագահի որոշման քաղաքական պատճառներին. «Նախագահն ըստ էության ոչ մի լուրջ գործառույթ չունի, կարող է ընդհանրապես չլինել, ու դրանից ոչինչ չի փոխվի: Ինչի՞ համար ենք փող ծախսում ու պահում այդ ինստիտուտը: Ինչ-որ Սերժի ուղեղից է եկել կամ փլված է, կամ էլ ամուլ է, իսկ նպատակը՝ հանցագործ: Հավանաբար գողապետական շրջանակներից իր վրա ճնշումներ կան, չէ՞ որ նրան բերել են իշխանության, նա հեղափոխությամբ չի եկել: Ինքը կոմպրոմիսային ֆիգուր է, իր լինել-չլինելը ոչինչ չի նշանակում, ու այստեղ գալիս է երկրորդ հանգամանքը՝ դոկտոր է, պրոֆեսոր է, անգլերեն գիտի, ժպտալ գիտի, Լոնդոնում է ապրել… Բայց այդ ամենը պետականաշինության հետ ոչ մի կապ չունի: Օրենքը կիրարկման փուլ է մտնելու, միակ առաջնային մանդատը Ազգային ժողովն ունի, նա է երկրի տերը: Իսկ նախագահը եթե ուզում է նեյնիմ անել՝ թող անի, ոչ մի բան չի փոխվելու»:
Ըստ մեր զրուցակցի՝ սա ժեստ է դեպի գողապետություն, իր անցյալ. «Երկրորդ շերտը, որում վստահ չեմ՝ Ամուլսարի հարցն է: Լուրերի համաձայն՝ նա Ամուլսարի հարցի խարդավանքների մասնակիցներից է, եթե ոչ՝ սեփականատերերից: Ուզում է դեմք ցույց տա, որպեսզի իրեն զիջումների գնան, բայց դա չի լինելու՝ անիմաստ թող չտանջվի: Ոչ թե պետք է այս Սահմանադրությունը վերասարքվի, այլ բոլորովին նոր Սահմանադրություն ընդունվի: Այդ ժամանակ մենք բոլորս կորոշենք՝ մեզ նախագահ պե՞տք է, թե՞ ոչ, այդքան ծախս անիմաստ պե՞տք է մեզ, թե՞ ոչ»:
Եզրափակելով՝ մեր զրուցակիցն ասաց՝ անկախ Արմեն Սարգսյանի կամքից՝ փոփոխությունները կմտնեն ուժի մեջ, և Հրայր Թովմասյանը կմնա անցյալոմ. «Դուք նկատի ունեցեք, որ նրան Սերժն է նշանակել, հետևաբար անմաքուր քայլերը բացառված չեն: Մենք պետք է մտածենք, թե երկիրն ինչպես վերաշինենք: Հայաստանը երկու խնդիր ունի՝ կորոնավիրուսի աղետը կանգնեցնել և երկրի զարգացման շտապ ծրագրեր կյանքի կոչել՝ արդյունաբերություն և այլն: Այլ բաներով մարդկանց ուղեղներն այլևս պետք չէ զբաղեցնել»:
Քաղտեխնոլոգ Արմեն Բադալյանը «Առաջին լրատվական»-ի հետ զրույցում մեջբերեց նախագահի որոշման քաղաքական և իրավական պատճառներ. «Որևէ օրենք ստորագրելուց առաջ նրա աշխատակազմի համապատասխան իրավաբանական վարչությունն իր եզրակացությունն է տվել: Բոլոր այն օրենքները, որ նախագահը ստորագրում է, այդ բաժնի եզրակացությանն է արժանանում: Կա նաև հարցի քաղաքական կողմը: Գաղտնիք չէ, որ քաղաքական դաշտում հարցի շուրջ մեծ աղմուկ է առաջացել, շատերն այն համարում են հակասահմանադրական գործընթաց, ոմանք համարում են, որ գրպանային Սահմանադրական դատարան ունենալու գործընթաց է, ու այդ աղմուկը ևս իր նշանակությունն է ունենում»:
Ըստ նրա՝ հնարավոր իշխանափոխությունց հետո այս օրենքների ընդունումը դառնալու է դատախազությունում քննարկման առարկա, և նախագահը չի ցանկանում այդ գործընթացի մասնակիցը լինել. «Բնականաբար, այդ ամենը նրա համար կարող է հեռուն գնացող բարդություններ ստեղծել:
Այս բոլոր հեռանկարները հաշվի առնելով՝ նախագահը չստորագրեց: Չի բացառվում, որ իշխանափոխությունից որոշ ժամանակ հետո նա կմնա նախագահ և հիմա երևի չի ցանկանում, որ այդ ամենն իր դեմ ուղղվի, անգամ եթե նա հեռանա երկրից: Այսինքն՝ անցանկալի գործընթացներից խուսափելու համար նախագահը հրաժարվեց ստորագրել»: