Հունիսի 30-ին տեղի է ունեցել Հայաստանի և Ադրբեջանի ԱԳ նախարարներ Զոհրաբ Մնացականյանի և Էլմար Մամեդյարովի տեսակոնֆերանսը, որն անցկացվել է ԵԱՀԿ Մինսկի խմբի համանախագահների, ինչպես նաև ԵԱՀԿ գործող նախագահի անձնական ներկայացուցչի միջնորդությամբ և մասնակցությամբ: Սա երկրորդ տեսակոնֆերանսն էր կորոնավիրուսի համավարակի տարածումից հետո: Տեսակոնֆերանսի ընթացքում անդրադարձ է կատարվել համավարակային պայմաններում խաղաղ գործընթացի շուրջ ստեղծված իրավիճակին:
Թեմայի շուրջ «Առաջին լրատվական»-ի հետ քննարկմանը մասնակցեցին Կովկասի ինստիտուտի փորձագետ Հրանտ Միքայելյանը, «Օրբելի» կենտրոնի փորձագետ Նարեկ Մինասյանը և ԱԺ «Իմ քայլը» խմբակցության պատգամավոր Տաթև Հայրապետյանը:
Նարեկ Մինասյանի դիտարկմամբ՝ կազմակերպված տեսակոնֆերանսի հիմնական առիթներից մեկը վերջին շրջանում լարվածության աճն էր, որն արձանագրվել է նաև ԵԱՀԿ Մինսկի համանախագահների կողմից և այս հեռավար հանդիպման կազմակերպումը լարվածության որոշակի թուլացման նպատակ էր հետապնդում: «Հատկանշական է, որ կողմերից յուրաքանչյուրը հանդիպմանը մասնակցում էր սեփական առաջնահերթություններով: Հայկական կողմը անդրադարձել է ադրբեջանական կողմի վերջին շրջանի ռազմատենչ հռետորաբանությանը, դա արտահայտվել է նաև համանախագահների հայտարարության մեջ: Ցանկալի կլիներ, որ համանախագահների անդրադարձը լիներ հասցեական և բացահայտ, սակայն համանախագահները, ինչպես նախկինում, որդեգրել են հավասարակշռված դիրքորոշում:
Ադրբեջանական կողմը մտահոգություն է արտահայտել Արցախում վերաբնակեցում իրականացելու և Արցախը Հայաստանին կապող երրորդ մայրուղու շինարարության առնչությամբ»:
Տաթև Հայրապետյանի դիտարկմամբ՝ Ադրբեջանի նպատակը ռազմական գործողությունների վերսկսումն է, և դա չսկսելը Ադրբեջանը պատճառաբանում է միջազգային իրադրությամբ: «Հայաստանի նպատակը անվտանգությանն ուղղված քայլերն են: Մեր դիվանագիտության գերխնդիրն է, որ հարցը չհասնի ռազմական ճանապարհին… Մեր նպատակն է ժամանակն օգտագործել անվտանգության ամրապնդման համար, որպեսզի ունենանք այնքան հզոր Հայաստան և Արցախ, որ Ադրբեջանը չմտածի ռազմական լուծման մասին»,- նշեց Տ. Հայրապետյանը:
Քննարկման մասնակիցների դիտարկմամբ՝ Հայաստանը պետք է պատրաստ լինի ցանկացած սցենարի:
Մանրամասն՝ տեսանյութում:
