Արցախի ժողովրդի անունից Արցախում արտադրված բժշկական նշանակության պարագաներ կուղարկվեն Ամերիկայի Միացյալ Նահանգների Կալիֆոռնիա նահանգ՝ կորոնավիրուսի համավարակի դեմ պայքարի համար: Այս մասին «Ֆեյսբուք»-ի իր էջում գրել է Արցախի Հանրապետության Ազգային ժողովի «Արցախի ժողովրդավարական կուսակցություն» խմբակցության ղեկավար Դավիթ Մելքումյանը: Մելքումյանը նշել է, որ օգնությունը խորհրդանշական բնույթ կկրի, բայց դրանով Արցախի Հանրապետությունն իր հնարավորությունների սահմաններում կմիանա COVID-19 համավարակի դեմ համաշխարհային պայքարին։
Գաղափարի հեղինակը, հիշեցնենք, ամերիկագետ Սուրեն Սարգսյանն է: Վերջինիս կարծիքով՝ հիմա ամենահարմար պահն է նման սիմվոլիկ ժեստ անելու համար: Կոնգրեսում այժմ ֆինանսական հատկացումների վերաբերյալ լսումներ են, և Արցախի կողմից այս քայլը շատ տեղին կլինի: Բացի այդ, ըստ նրա, թեպետ ադրբեջանցիները միլիոնավոր օգնություն են ուղարկել ԱՄՆ՝ Արցախից ուղարկվողը շատ ավելի մեծ էֆեկտ կունենա:
Քաղաքագետ Ռուբեն Մեհրաբյանը ևս «Առաջին լրատվական»-ի հետ զրույցում ողջունեց այս գաղափարը. «Նախևառաջ համամարդկային համատեքստում շատ կարևոր քայլ է: Ի վերջո, գաղտնիք չէ, որ Արցախում կորոնավիրուսի համաճարակի առումով իրավիճակը բարվոք է, մինչդեռ Միացյալ Նահանգներում՝ ոչ այնքան: Ես կարծում եմ, որ սիմվոլիկ լինելով հանդերձ՝ այս քայլը շատ դրական է և նաև Արցախի ճանաչելիության առումով է շատ կարևոր՝ հատկապես ամերիկյան հասարակության մոտ և հատկապես այնպիսի նահանգում, ինչպիսին Կալիֆոռնիան է, որն, ընդ որում, ճանաչել է Արցախը որպես անկախ պետություն»:
Ըստ մեր զրուցակցի՝ որոշումը միանգամայն տրամաբանական է և պետք է գովեստի խոսքեր ասել թե՛ գաղափարի հեղինակին և թե՛ իրականացնողներին՝ լինեն նրանք անհատներ, թե պետական ինստիտուտներ:
Հարցին՝ արդյոք հնարավո՞ր է, որ այս նախաձեռնությունը բացասաբար ընկալվի այլ պետությունների կողմից, Ռուբեն Մեհրաբյանը պատասխանեց. «Ես հիմք չեմ տեսնում, թե ինչից պետք է այդ հիպոթետիկ պետությունները դժգոհեն»:
Քաղաքագետ Արմեն Վարդանյանը ևս ողջունում է այս նախաձեռնությունը: Նա «Առաջին լրատվական»-ի հետ զրույցում կարծիք հայտնեց, որ որքան էլ սա սիմվոլիկ նշանակություն ունի, քարոզչական իմաստով միանշանակ դրական կընկալվի. «Ավելի շատ քարոզչական նպատակով կարող ենք օգտագործել, քան ռեալպոլիտիկի տեսանկյունից: Ինչու ոչ՝ ԱՄՆ-ում հայ լոբբիստները սա կարող են քարոզչական նպատակով օգտագործել Սպիտակ տնից Արցախին տրվող օգնությունն ավելացնելու կամ պահպանելու շրջանակներում: Այնպես որ, քայլը որքան էլ սիմվոլիկ է, այդուհանդերձ բավականին ուշագրավ է և իր մեջ կարևոր մեսիջներ է պարունակում»:
Վարդանյանի խոսքով՝ շատ դեպքերում միջպետական հարաբերություններում քարոզչական բաղադրիչն ավելի կարևոր է, քան իրական բաղադրիչը: «Ակնհայտ է, որ գերհզոր պետությունը չի կարող մնալ Արցախից եկող չնչին օգնության հույսին, բայց քարոզչական նպատակներով այն օգտագործելով՝ կարող ենք շատ մեծ քաղաքական դիվիդենդներ ստանալ»,- եզրափակեց մեր զրուցակիցը:
