Ինտերպոլ միջազգային կազմակերպությունը հրաժարվել է դիտարկել ԱՄՆ նախագահ Դոնալդ Թրամփի և Իսլամական հեղափոխության պահապանների կորպուսի (IRGC) գեներալ Ղասեմ Սոլեյմանիի սպանության հնարավոր այլ մասնակիցների հետախուզման վերաբերյալ Իրանի իշխանությունների հարցումը: Այս մասին «ՌԻԱ Նովոստի»-ին հաղորդել են կազմակերպության Լիոն քաղաքում գտնվող կենտրոնական գրասենյակում:
Դատական իշխանություններն Ինտերպոլից պահանջել են միջազգային հետախուզում հայտարարել 30-ից ավելի անձանց նկատմամբ, որոնք, իրենց տեղեկություններով, մասնակցել են Սոլեյմանիի սպանության նախապատրաստմանը:
Կազմակերպությունը նշել է, որ իրենց սահմանադրության 3-րդ հոդվածի համաձայն, Ինտերպոլը չի կարող քաղաքական, ռազմական, կրոնական կամ ռասայական բնույթի միջամտություն կամ գործողություն իրականացնել:
«Ինտերպոլը չի դիտարկի այդ հարցումը», – ասել է գործակալության աղբյուրը:
Սոլեյմանին սպանվել է հունվարի 3-ին, Բաղդադի օդանավակայանի մերձակայքում, ԱՄՆ ռազմաօդային ուժերի հրթիռային հարվածի հետևանքով: