Վարչապետ Նիկոլ Փաշինյանը հունիսի 25-ին խորհրդարանում անդրադարձավ երկրում տիրող ներքաղաքական իրավիճակին: Փաշինյանը նշեց, որ ԲՀԿ-ն դահլիճում չի ոչ թե նրա համար, որ հետապնդվում է, այլ որ նրանք չկան այլևս, ինքնաոչնչացել են։ Փաշինյանը նաև ընդգծեց, որ այսօր Հայաստանում քաղաքական դաշտի բարեփոխում է տեղի ունենում. «Նրանք, ովքեր կուլիսներից մարիոնետների նման կառավարվել են, այլևս Հայաստանի քաղաքական դաշտում տեղ չեն ունենալու, և նրանք, ովքեր կուլիսներից մարիոնետների են կառավարել, նրանք այս քաղաքական դաշտում տեղ չեն ունենալու»: Վարչապետի խոսքով՝ հաջորդ խորհրդարանում տեղ են ունենալու միայն այնպիսի քաղաքական ուժեր, որոնք պաշտպանում են 2018 թավշյա ժողովրդական հեղափոխության արժեքները:
«Առաջին լրատվական»-ի հետ զրույցում «Ժողովրդավարական հայրենիք» կուսակցության նախագահ Պետրոս Մակեյանն ասաց՝ վարչապետը պարզապես բարի ցանկություն է հայտնում, իրավիճակին ուշացած գնահատական է տալիս. «Ո՛չ կախարդական փայտիկ կա, ոչ էլ համապատասխան մթնոլորտ: Համաճարակի առկա պայմաններում էլ կուսակցությունների աշխատանքը պարալիզացված է: Օրինակ՝ մենք 6 ամիս է՝ չենք կարողանում համագումար անել»:
Ըստ Մակեյանի՝ վարչապետը ճիշտ հետևություն է արել, բայց դա պետք է արվեր դեռ 2018 թվականի դեկտեմբերին կայացած խորհրդարանական ընտրություններից առաջ, որպեսզի այս խորհրդարանում չլինեին նախկին համակարգին սպասարկող քաղաքական ուժեր: «Եթե վարչապետն այն ժամանակ հետամուտ լիներ, ստեղծեր համապատասխան մթնոլորտ, մենք այսօր այս պատկերը չէինք ունենա: Փաստորեն մենք հինգ տարով հետ ընկանք, ու ես չգիտեմ, թե հիմա այս գնահատականն ինչ արդյունք կտա»,- եզրափակեց նա:
Քաղաքագետ Անդրիաս Ղուկասյանը չի կարծում, թե վարչապետի հայտարարությունն ուշացած է: Ըստ նրա՝ ամեն ինչ ունի իր օրինական զարգացման կանոնը: «Այլ կերպ դժվար է պատկերացնել: Այն ուժերը, որոնց համար Սերժ Սարգսյանի քրեական ռեժիմի հաստատումը քաղաքական նպատակ է եղել, արել են ամենը, որ այդ օրը շուտ գա: Բայց ռեժիմը չդիմացավ նոր իրողություններին ու ստիպված եղավ հեռանալ, իսկ այդ հեռացման համար պետք էին որոշակի երաշխիքներ: Այդ երաշխիքներից մեկն էլ այն էր, որ այսօրվա խորհրդարանում Սերժ Սարգսյանի և նրա քրեական ռեժիմի հակառակորդ ուժեր չլինեն»,- «Առաջին լրատվական»-ի հետ զրույցում ասաց նա:
Ըստ մեր զրուցակցի՝ այժմ իշխող ուժը նման պայմաններ ապահովելու անհրաժեշտություն չունի, իրողություններն այլ են. «Օբյեկտիվորեն այդպես էլ պետք է լիներ: Եվ հիմա Սերժ Սարգսյանի ու նրան սպասարկող քաղաքական ուժերի հաշվարկը սխալ է, երբ վերադառնալու երազանք են փայփայում: Համենայնդեպս, ես և իմ ընկերները ամեն ինչ անելու ենք, որ դա տեղի չունենա»:
