ԵԱՀԿ Մինսկի խմբի համանախագահ երկրները, առանձնապես Ռուսաստանը և ԱՄՆ-ը արդեն չեն վստահում Ադրբեջանի նախագահ Իլհամ Ալիևին և իմ կարծիքով, արդեն նրա դուրս գրման գործընթացն է սկսված: Մեզ հետ զրույցում նշեց Արցախի Ազգային ժողովի նախագահ Արթուր Թովմասյանը՝ անդրադառնալով Ադրբեջանի նախագահ Ալիևի հայտարարություններին, որտեղ վերջինս մասնավորապես նշել էր, թե նորանկախ Հայաստանի ամբողջ պատմությունն ամոթի պատմություն է:
«Եթե հիշում եք՝ դեռևս անցյալ տարի խոսվում էր Ալիևի հիվանդության մասին, և նա շտապ խորհրդարանական ընտրություններ էր անցկացնում, ինչպես նաև կնոջը դարձնելու Ադրբեջանի նախագահ: Հիմա ես չգիտեմ՝ հիվանդ Ալիևն է ավելի կանխատեսելի, թե առողջը: Համենայնդեպս, գտնում եմ, որ նա գիտակցում է, որ հնարավոր է, որ այն հեղափոխությունը, որ տեղի ունեցավ Վրաստանում, Հայաստանում, անխուսափելի է նաև Ադրբեջանում: Դա ցայտնոտի մեջ է գցում ԱԼիևին: Ընդհանրապես, երբ առաջին անգամ նա նախագահ ընտրվեց, միշտ էլ աչքի է ընկել ռազմական հռետորաբանությամբ՝ ասելով, որ եթե բանակցային գործընթացով չլուծվի Արցախի հարցը, ռազմական ճանապարհով ինքը լուծելու է: Սա կարելի է դիտարկել երկու տեսանկյունից. մեկը ներքին սպառման համար, մյուսը միջազգային հանրության համար»,-ասաց նա:
