ՀՀ նախագահ Արմեն Սարգսյանն օրերս հանդիպում է ունեցել Հայաստանի արդյունաբերողների և գործարարների միության նախագահության անդամ մի խումբ գործարարների հետ՝ քննարկելու համավարակի հետևանքով տնտեսության ոլորտում առաջացած դժվարություններն ու խնդիրները, դրանք լուծելու ուղիները, գործարարներին աջակցելու հնարավորությունները, զարգացման ճանապարհները։ Հանդիպմանը մասնակցել են Հայաստանի արդյունաբերողների և գործարարների միության նախագահ Արսեն Ղազարյանը, նախագահության անդամներ Նորայր Խաչատրյանը («Իմէքս գրուպ» ՍՊԸ), Արմեն Մկոյանը («Էլիտ գրուպ» ՓԲԸ), Վահագն Մկրտչյանը («Արմենիա Վայն գործարան» ՍՊԸ), Արմեն Տեր-Տաճատյանը («Տեր-Տաճատյան իրավաբանական և բիզնես խորհրդատվական» ՓԲԸ)։
Հանդիպման ընթացքում նախագահը մասնավորապես հայտարարել է․
«Հստակ է, որ համավարակի հետևանքով տնտեսությունը դժվար օրեր է ապրելու։ Խնդիրները բազմաթիվ են։ Կա սպասվելիք դժվարությունների, խնդիրների ընդհանուր ֆոն՝ հատկապես տնտեսության, աշխատանքի շուկայի ոլորտներում։ Անհանգիստ եմ բոլորի համար՝ տնից աշխատողից, չգրանցված աշխատողից մինչև արտագնա աշխատողի համար։ Պետք է փորձենք օգնել և՛ անհատ ձեռներեցին, և՛ մեծ ընկերություններին, որոնք մեծ պատասխանատվություն ունեն։ Աշխատանքի շուկան և մեր յուրաքանչյուր քաղաքացու բարեկեցությունը շատ էական են»։
Նախագահ Սարգսյանը նշել է նաև, որ համավարակից հետո փոփոխված աշխարհում վերաբաշխվելու են դերերը և շուկաները.
«Մենք պետք է ուղղակի իրականության աչքերին նայենք և կարողանանք լուծումներ գտնել՝ և՛ ներքին, և՛ արտաքին ոլորտներում»։
Այս համատեքստում նա անդրադարձել է նախագահական նախաձեռնություններին, մասնավորապես, ATOM (Advanced tomorrow) նախաձեռնությանը, որի նպատակն է ստեղծել արդյունաբերության զարգացման լոկոմոտիվներ, որը վերաբերում է ժամանակակից նորագույն տեխնոլոգիաներին, արհեստական բանականությանը։ Արդեն իսկ նախնական պայմանավորվածություններ կան ավելի քան 15 ընկերությունների հետ։
Արմեն Սարգսյանի խոսքերով՝ նախագահական մեկ այլ նախաձեռնություն վերաբերում է սննդի անվտանգության միջանցքի ստեղծմանը։
«Օգտագործելով իմ կապերը՝ փորձում եմ ստեղծել մթերքի անվտանգության միջանցք։ Նպատակը հետևյալն է՝ ԱՄԷ, Կատարի, Քուվեյթի, այլ երկրների հետ համագործակցելով՝ բացել նոր միջանցք, որպեսզի մենք ոչ միայն ռուսական մեծ շուկան ունենանք, այլ նաև՝ դեպի հարավ շուկան։ Իմ դերը լինելու է աջակցել, որ այդ միջանցքը երկկողմանի բացվի, որ մենք կարողանանք արտահանել ու ներկրել»,-ասել է նա։
Գործարարներն իրենց հերթին նախագահին են ներկայացրել իրենց ոլորտներում առկա տարբեր խնդիրներն՝ օրենսդրականից մինչև բարեփոխումներ, ինչպես նաև իրենց մոտեցումներն ու հիմնահարցերի լուծման պատկերացումները:
Հայաստանի գործարարների և արդունաբերողների միության նախագահ Արսեն Ղազարյանը «Առաջին լրատվական»-ի հետ զրույցում տեղեկացրեց, որ ինքն անդրադարձել է Հայաստանի զարգացման տեսլական ունենալու, ներդրողների պահանջներին արագ արձագանքելու խումբ ստեղծելու կարևորությանը։
Մեր զրուցակիցը նախագահի հետ հանդիպումը դրական գնահատեց՝ ընդգծելով, որ բավականին լավ տպավորություն են ստացել և արձանագրել, որ նախագահ Սարգսյանի մոտ քննարկման ընթացքում գործարարների կողմից հնչեցված խնդիրների լուծման ուղղությամբ մեծ պատրաստակամություն կար։
«Շատ լավ ու աշխատանքային մթնոլորտ էր ․ նախագահ Սարգսյանի հետ որոշեցինք, որ առաջիկայում էլ երկուստեք շարունակական հանդիպումներ կլինեն՝ հատկապես օտարերկրյա ներդրումներ ներգրավելու, արտաքին միջազգային կապեր ստեղծելու, համատեղ միջազգային տնտեսական ֆորումներ և բազմաթիվ այլ ծրագրեր իրականացնելու համար»,- ընդգծեց Արսեն Ղազարյանն ու միևնույն ժամանակ հավելեց․
«Քննարկել ենք նաև այս պանդեմիայի պայմաններում Հայաստանի առջև ծառացած նոր մարտահրավերներն ու հատկապես այս համավարակից հետո պետք է փորձենք ամեն ինչ անել, որպեսզի օտարերկրյա ներդրողների համար հայկական շուկան գրավիչ դառնա, կարողանանք հնարավորինս շատ ծրագրեր իրականացնել՝ մեզ դա օդի ու ջրի պես հարկավոր է»։
Ի՞նչ ակնկալիքներ ունեն գործարարները նախագահից, հնարավոր համարո՞ւմ եք այդպիսի ծրագրերի լայնամասշտաբ իրականացումը, Ղազարյանը պատասխանեց․
«Եթե հանդիպումներ ենք ունենում, այդպիսի հարցեր ենք արծարծում, ծրագրեր ենք մշակում, ապա նշանակում է, որ մեր հերթին փորձում ենք մեր տնտեսության զարգացմանը մասնակից լինել, նախագահից էլ նույն ակնկալիքներն ունենք և հուսով ենք, որ միասնաբար կկարողանանք մեր այդ գաղափարները կյանքի կոչել»։
Նշենք նաև, որ նախագահ Սարգսյանը հանդիպման ընթացքում նաև հայտարարել է, որ մասնավորապես, այս տարի հոկտեմբերին նախատեսվում է Հայաստանում անցկացնել «Հորասիս-Չինաստան» միջազգային ներդրումային համաժողովը, որին մասնակցելու են մի քանի տասնյակ չինական խոշոր ընկերությունների ղեկավարներ, ինչը լավ առիթ է նրանց ներկայացնել Հայաստանի ներդրումային հնարավորություններն ու ներուժը:
