Հայաստանում արդեն ուժի մեջ են մտել սահմանադրական փոփոխությունները։ Սահմանադրական դատարանի արդեն նախկին երեք դատավորներն ու Սահմանադրական դատարանի նախագահի լիազորություններ չունեցող Հրայր Թովմասյանը հայտարարեցին, որ շարունակելու են պաշտոնավարել և իրենք առոչինչ են ճանաչում լեգիտիմ խորհրդարանի ընդունած սահմանադրական փոփոխությունները։ Ի՞նչ է սրան հաջորդելու․ «Առաջին լրատվական»-ի հարցին փաստաբան, նախկին դատավոր Պարգև Օհանյանը պատասխանեց․ «Սրա հետ կապված ինչ-որ դասախոսություն պետք չէ կարդալ։ Ազգային ժողովի ընդունած որոշումը վարչական ակտ չէ։ Ուստի, դրա վիճարկումը Վարչական դատարանում ընդդատյա չէ։ Ինչևէ, գիտական վեճի մեջ չմտնենք։ Ամեն դեպքում՝ կարող են անհատապես դիմել, կարծում եմ՝ դատարանն իր խոսքը կասի։ Էնպես որ, լուրջ չեմ վերաբերվում»։
Իշխանությունը զավթելը, կամ Սահմանադրությամբ չնախատեսված միջոցներով, ճանապարհներով երկրի Սահմանադրական դատարանի դատավորի լիազորություններին տիրանալը արդյո՞ք քրեական հետապնդման ենթակա չէ, և արդյո՞ք այս անձինք գնում են հենց այս ապօրինի ճանապարհով «Առաջին լրատվական»-ի հարցին Պարգև Օհանյանը պատասխանեց․ «Գիտեք, փորձեմ հակիրճ ձևակերպել, որովհետև իրավագիտության առումով սրանք լուրջ զրույցներ են։ Նախ ասեմ, որ իրավագիտական պրակտիկայի առումով դեռ ոչ ոք չգիտի, թե ինչ է սահմանադրական կարգի տապալումը։ Մենք միայն գիտենք, որ կա հոդված՝ իր ենթահոդվածներով, և նախկինի համեմատ որոշակի հստակություն է մտցված, որտեղ ասվում է, թե սահմանադրական կարգի տապալում ասելով՝ պետք է հասկանանք Սահմանադրության 1-5 հոդվածների և հոդված 6-ի 1-ին մասի, այսպես ասած՝ ոտնահարումն այդ նորմերի, իրավունքների։ Բայց այնտեղ այնքան մանրուքներ կան, որոնց մասին կարելի է անվերջ խոսել։ Սակայն ես ասեմ իմ անձնական կարծիքը։ Մենք՝ իրավաբաններս, հարցը երբ դնում ենք դասական իրավական պետության տեսանկյունից․ կա Սահմանադրություն, որի պահանջը չի պահպանվել, ուստի՝ առ ոչինչ է, և, այո՛, կա սահմանադրական կարգի տապալում։ Բայց մենք մոռանում ենք, որ տեղի է ունեցել հեղափոխություն, որը շարունակվում է։ Հիմա դա ում դուր կգա, ում դուր չի գա ու կասի, որ հեղափոխություն չի, այլ իշխանափոխություն է, դա առանձին խոսելու թեմա է։ Ես քաղաքագետ չեմ, բայց կարող եմ ապացուցել, որ սա դասական հեղափոխություն է»։
Մանրամասները՝ տեսանյութում։