«Արվեստագետների համար դժվար է համավարակով պայմանավորված փակուղին, երբ ստիպված են մնալ տանը: «Խեղաթյուրվել է հատկապես այն արվեստագետների ապրելակերպը, որոնց գործունեությունը բեմի հետ է կապված: Նրանք անելանելի վիճակում են, քանի որ հավանաբար վերջինը կբացվեն դահլիճները»,- այս մասին «Առաջին լրատվական»-ի հետ զրույցում ասաց նկարիչ, քանդակագործ, դիզայներ Նուռը՝ հավելելով, որ նոր բան պետք է մտածել՝ այդ մարդկանց օգնելու համար, որպեսզի չկորցնենք լավագույն արտիստներին: Նա նաև հավելեց, որ արվեստի կրակը վառ պահելու և ֆինանսապես արվեստագետներին աջակցելու նպատակով փորձում է հիմնադրամ բացել, որտեղ կներգրավվեն դոնորներ՝ և՛ ներսից, և՛ դրսից:
Մեր զրուցակիցը նաև մտահոգություն արտահայտեց, որ բացի կորոնավիրուսից առաջացած լարվածությունից, երկրում այլ պատճառներ էլ կան լարվածության, արվեստը գցել են մի կողմ:
Անդրադառնալով դիտարկմանը, որ կորոնավիրուսի դեմ պատերազմում, ի տարբերություն, օրինակ, Վրաստանի, որտեղ ընդդիմությունը, անկախ տարաձայնություններից, միասնական ճակատով հանդես եկավ իշխանության հետ, Հայաստանում առողջապահական խնդիրը վերածվել է քաղաքականի՝ Նուռը նշեց. «Ասել, որ հանրությունը իրավագիտակից չէ և չի հետևում կառավարության հորդորներին ու դրա համար է հիվանդանում, պրոֆեսիոնալ չէ, և ցինիզմ կա դրա մեջ: Հանրությանը երբեք ոչ մի երկրում չես կարող համարել ոչ իրավագիտակից, դրա համար կա կառավարություն, որը պետք է կառավարի հանրությանը… Հանրությունը չգիտեր՝ ինչն է ճիշտ, ինչն է սխալ, տարբեր կարծիքներ էին արտահայտվում կառավարության ներկայացուցիչների կողմից, և հանրությունը որոշեց անել այն, ինչ իրեն է հարմար: Այդ պատճառով էլ ստեղծվել է այս պատկերը: Ամեն մարդ՝ պաշտոնյա, թե շարքային քաղաքացի, պետք է ընդունի իր սխալը»:
Նուռի կարծիքով՝ այսօր ատելությունը չափազանց շատ է, ինչը խանգարում է համախմբանը: Նա կոչ արեց՝ որպես օգնության ճիչ. «Կան ֆեյքեր, կոչ եմ անում բոլոր ֆեյքատերերին՝ ֆեյքահովիվներին՝ գոնե վերահսկե՛ք ձեր ֆեյքերի լեզուն, բառապաշարը, այդ հայհոյողները սերունդ են փչացնում: Ձեր անհամաձայնությունները հայերեն կիրթ բառապաշարով արտահայտեք»:
Մանրամասն՝ տեսանյութում:
