Հանրապետությունում սկսվել են մրգի, բանջարեղենի մթերման աշխատանքները: Վերամշակող ընկերությունները վստահեցնում են՝ գյուղացիական տնտեսությունները բերքի մթերման հետ կապված որևէ խնդիր չեն ունենա:
«Առաջին լրատվական»-ի հետ զրույցում «Արտֆուդ» ընկերության գլխավոր տնօրեն Վաչագան Կարապետյանը տեղեկացրեց՝ վաղը չէ մյուս օրը սկսելու են ծիրանի մթերումը, վաղը կհայտարարեն, թե ինչ գնով: Այս պահին, տնօրենի խոսքով, դեռ որոշված չէ: «Կարծում եմ՝ անցյալ տարվա գնային մակարդակին կլինի»,- ասաց Կարապետյանը:
Կորոնավիրուսային համավարկի հետ կապված ընկերությունը որևէ խնդիր չունի թե՛ մթերման, թե՛ արտահանման, թե՛ իրացման առումով: «Բնականոն հունով աշխատում ենք: Արտահանման հետ կապված խնդիրներ չկան: Ընդհակառակը, դրսում պարենամթերքի պահանջարկն ավելի է շատացել: Արտահանման ծավալները ապրիլ ամսից սկսած կտրուկ բարձրացել են»,- նշեց ընկերության տնօրենը և ավելացրեց՝ այս տարի ապրիլ ամսից մինչև հիմա 30 տոկոս ավելի շատ են արտահանում իրականացրել, քան նախորդ տարի:
Գյուղացիների մտահոգությունների վերաբերյալ, որ հնարավոր է՝ բերքը չմթերվի և փչանա, «Արտֆուդ» ընկերության տնօրենը հավաստիացրեց՝ իրենք վերջին երկու տարում նման խնդիր չեն ունեցել, բերքը մինչև վերջին կիլոգրամը մթերվել է ու կմթերվի:
«Այս տարի բերքը նախորդ տարվա համեմատ ավելի քիչ է: Իսկ մեր պլանների մեջ մտնում է ավելի շատ մթերել, քան նախորդ տարի: Դրանից ելնելով չեմ կարծում, որ ինչ-որ խնդիր կարող է առաջանալ»,- վստահեցրեց Վաչագան Կարապետյանը:
Տեղական շուկայում ևս իրենց ապրանքի իրացման ծավալները չեն նվազել՝ նշեց ընկերության ղեկավարը: Կարապետյանի խոսքով՝ նախորդ տարվա հետ համեմատած, այս տարի ևս նույն ծավալներով տեղական շուկայում իրացվել է ապրանքը: «Կոնկրետ մեզ մոտ նվազում չկա, իսկ ընդհանուր շուկայի վերաբերյալ գնահատական չեմ կարող տալ»,- ասաց «Արտֆուդ» ընկերության գլխավոր տնօրեն Վաչագան Կարապետյանը:
Պռոշյանի կոնյակի գործարանի հիմնադիր տնօրեն Արմեն Գասպարյանը մեզ հետ զրույցում տեղեկացրեց, որ իրենք մի փոքր նվազում ունեն արտահանման և իրացման ոլորտում: Չնայած այդ հանգամանքին՝ Գասպարյանը վստահեցրեց, որ մթերումները իրականացվելու են ամբողջ ծավալով, անգամ նախորդ տարվանից ավելի շատ:
Գործարանի տնօրենի տեղեկացմամբ՝ կառավարությունն իրենց աջակցել է, ստացել են 500 մլն դրամ անտոկոս վարկ, մոտ 1 մլրդ 800 մլն դրամ էլ խոստացել են խաղողի մթերման ժամանակ տրամադրել: «Ինձ թվում է՝ խնդիր չի լինի, նույն ծավալով մթերելու ենք: Մյուսները՝ չգիտեմ: Մենք ուզում ենք շատ մթերել, անգամ անցած տարվա ծավալներից ավելի: 30 հազար տոննայից ավելի ուզում ենք մթերել»,- հայտարարեց Պռոշյանի կոնյակի գործարանի հիմնադիրը և շեշտեց՝ հիմնականում աշխատելու են արտահանման ուղղությամբ:
Գասպարյանի խոսքով՝ իրենք տեղական շուկայում իրացման ծավալների փոքր-ինչ նվազում ունեն: «Ընդունելու ենք նաև սմբուկ, լոլիկ: Ամեն ինչը անցած տարվա ծավալներից ավելի շատ ենք մթերելու: Մեր հիմնարկը մթերման ծավալների հետ կապված խնդիր չունի, մտահոգություն չկա: Ինչ էլ խնդիր ունենք գումարի հետ կապված, կառավարությունն օգնել է ու խոսք է տվել, որ կօգնի»,- նշեց գործարանի տնօրենը:
Գործարանում այս պահին թթի մթերման պրոցես է ընթանում: Գինը տատանվում է 130-165 դրամի սահմաններում՝ ըստ շաքարայնության: Այս տարի թթի բերքը նախորդ տարվա համեմատ ավելի լավ է:
