«Սահմանադրական դատարանը անկախության տարիների ընթացքում ֆորմալ է գոյություն ունեցել, կարևոր, վճռական պահերին, երբ հանրության համար էական է եղել ՍԴ-ի որոշումը, ՍԴ-ն իրեն դրսևորել է որպես տվյալ պահի իշխանության կցորդ»,- «Առաջին լրատվական»-ի հետ զրույցում այս մասին ասաց պատմաբան Հրանտ Տեր-Աբրահամյանը՝ հավելելով, որ իրական ՍԴ-ի ձևավորումը, ըստ էության պետք է սկսել զրոյից:
«Եթե քաղաքական մեր սերունդը կարողանա լուծել իրական Սահմանադրական դատարան ստեղծելու խնդիրը, ապա դրանով մեր պետության և կյանքի կարևորագույն խնդիրը լուծած կլինենք, բայց իհարկե դա մեկ ամսվա կամ մեկ տարվա ընթացքում չի լինի, դա պրոցես է, որի նպատակը պետք է լինի այն, որ ՍԴ-ն իշխանության կցորդ չպետք է լինի»,- նշեց Հրանտ-Տեր Աբրահամյանը՝ հավելելով, որ պետության մեջ անհրաժեշտ է լինի մի մարմին, որը վեր կլինի կուակցական պայքարից, Հայաստանի ինքնիշխանության բարձրագույն կրողը կլինի, և որի վրա ո՛չ ներքին, ՛ոչ արտաքին ազդեցություններ չեն տարածվի. այնտեղ կգերիշխի միայն օրենքը: Պատմաբանի խոսքով՝ իշխանության մեջ կա այդպիսի ՍԴ ստեղծելու ցանկություն և քաղաքական կամք, բայց հանրությունն էլ պետք է գիտակցի դրա անհրաժեշտությունը և պարտադրի. միգուցե իշխանության մեջ գայթակղություն առաջանա ունենալ գրպանային ՍԴ, բայց հանրությունը չպետք է թույլ տա:
Անդրադառնալով դիտարկմանը, որ ՍԴ պաշտոնանկ արված անդամները և լիազորությունները կասեցված ՍԴ նախագահ Հրայր Թովմասյանը հայտարարել են, որ շարունակելու են պաշտոնավարումը, քանի որ խորհրդարանի ընդունած սահմանադրական փոփոխություններն իրենց համար առ ոչինչ են, Հրանտ Տեր- Աբրահամյանը նշեց. «Ցավում եմ, որ ընտրել են այս ճանապարհը, քանի որ ՍԴ անդամներին տրված էր արժանապատիվ հեռնալու ճանապարհ… Նրանց աջակցող շրջանակները շարունակում են գործել ՍԴ-ն որպես քաղաքական գործիք դիտարկելու տրամաբանությամբ»:
Անդրադառնալով ներքաղաքական զարգացումներին, Ծառուկյան-Վանեցյան համագործակցությանը՝ պատմաբանը մասնավորապես նշեց, որ Ծառուկյանը շանս ուներ ներգրավվելու նոր քաղաքական դաշտի մեջ. «ԲՀԿ-ն, բացի փողից, նաև ընտրազանգված ունի, ինչ որ չափով հանրային շահ էր ներկայացնում, իսկ Վանեցյանը «այլ օպերայից է», արտաքին ուժերի հետ է հույս կապում, բայց ով որ հույսը դնում է արտաքին ուժի վրա, նա դատապարտված է…»:
Մեր զրուցակիցը նաև ընդգծեց, որ Հայաստանում կան ուժեր, որոնք գործում են Իլհամ Ալիևին զուգահեռ:
Մանրամասն՝ տեսանյութում:
