Սահմանադրական փոփոխությունների հրապարակումից հետո Սահմանադրական դատարանի շուրջ զարգացումները չեն հանդարտվում. Սահմանադրական փոփոխությունների հարցը շարունակում է մնալ քննարկումների առարկա:
Սահմանադրական փոփոխություններն արդեն ուժի մեջ են մտել. ուժի մեջ մտած օրենքով լիազորությունները դադարեցված ՍԴ պաշտոնանկ արված անդամները և ՍԴ՝ լիազորությունները կասեցված նախագահ Հրայր Թովմասյանը հայտարարել են, որ շարունակելու են պաշտոնավարել, քանի որ սահմանադրական փոփոխություններն իրենց համար առ ոչինչ են:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Աղասի Մարգարյանը, իրավապաշտպան Նինա Կարապետյանցը և փաստաբան Արայիկ Պապիկյանը:
Արայիկ Պապիկյանի խոսքով՝ Հրայր Թովմասյանի հեղինակած Սահմանադրությունը լեգիտիմ չի եղել, չի ընդունվել հայ ժողովրդի կողմից, կեղծվել է Սերժ Սարգսյանի համար: «Մենք բարձրաձայնում էինք, որ փոխությունների անհրաժեշտություն կա, քանի որ այն ական է մեր պետականության համար, որը մի օր պայթելու է. ականը արդեն պայթել է:
Այժմ մենք ունենք օրենսդիր մարմնի կողմից ընդունված իրավական ակտ: Իսկ օրենսդիր մարմնի լեգիտիմությունը մինչ օրս կասկածի տակ չի դրվել, և հիմա 4 անձինք ձեռնոց են նետել մի մարմնի, որն ընտրվել է ժողովրդի կողմից, այսինքն՝ ժողովրդին են ձեռնոց նետել, և դա պետք է դիտարկել Քրեական օրենսգրքի համապատասխան հոդվածների տեսանկյունից»:
Նինա Կարապետյանցի դիտարկմամբ՝ հանցավոր ռեժիմին անձնվեր ծառայող բոլոր կառույցների, ուժերի ու անձերի տեսակետը միշտ իրականությունից կտրված է եղել. «Նրանք միշտ հասարակությունից կտրված են եղել, իրենց համար կոմֆորտ զոնա են ստեղծել, որից մինչև հիմա չեն կարողանում դուրս գալ, չեն հասկանում, որ Հայաստանում տեղի է ունեցել հեղափոխություն:
Սահմանադրությունը ժողովրդի վզին էր փաթաթվել հանուն Սերժ Սարգսյանի և հանցավոր ռեժիմի վերարտադրության: Նրանց պետք է վերադարձնել իրականություն և ցույց տալ յուրաքանչյուրի տեղը: Դատական համակարգի բարեփոխումները ուշացած են տեղի ունենում, բայց ամեն ինչ նորմալ կընթա, ուղղակի իշխանությունը պետք է այս գործընթացում հետևողական լինի, սկսած գործողությունը թերի ու կիստ չթողնի»:
Աղասի Մարգարյանի դիտարկմամբ՝ ՀՀ-ում բովանդակային առումով ՍԴ չի եղել. «Դատաիրավական համակարգի կառույցները եղել են քրեաօլիգարխիկ, կիսահանցագործ, քրեական մշակութին հարող սկզբունքների և հայեցակարգերի վրա ձևավորված վարչական կցորդներ. դատաիրավական համակարգը անցած ռեժիմի ձեռքին ծառայել է որպես մահակ»: ՍԴ պաշտոնանկ արված դատավորների հայտարարությունները, վերլուծաբանի գնահատմամբ, քաղաքական են,և նրանց աջակցող հայտնի շրջանակները պայքարում են զուտ իրենց քաղաքական շահերի համար:
Ի՞նչ պետք է անել ապագայում ապաքաղաքական Սահմանադրական դատարան ունենալու համար: Անդրադառնալով այս հարցին, Նինա Կարապետյանցն ընդգծեց, որ այդ նպատակին հասնելու համար երկու հիմնական գործողություն պետք է իրականացնել.«Առաջին՝ անհրաժեշտ է քաղաքական գնահատական տալ անցյալին, և երկրորդ՝ պետք է փոխել Սահմանադրությունը և դրա արդյունքում ամբողջապես փոխել ՍԴ կազմը: Հրայր Թովմասյանի, Արևիկ Պետրոսյանի նման մարդիկ չպետք է հայտնվեն ՍԴ-ում»:
Մանրամասն՝ տեսանյութում:
