Համաճարակային իրավիճակը չի խախտել Գյումրիի Բարեկամության այգու վերականգնման ծրագրի ժամանակացույցը: Այս մասին այսօր հանրային քննարկմանը հայտնել է ծրագրի ղեկավարը:
Հիշեցնենք՝ Բարեկամության այգու վերականգնումը նախաձեռնել է «Հայաստանի զարգացման նախաձեռնություններ» հիմնադրամը՝ IDeA-ն, կառավարության հետ համատեղ:
Կառավարությունը մեկուկես մլն դոլար է հատկացրել, իսկ հիմնադրամի ներդրումը կազմում է շուրջ 10 մլն դոլար: Նախատեսվում է այգին բարեկարգել, դարձնել կանաչապատ ժամանակակից տարածք: Այժմ նախագծային աշխատանքներ են ընթանում: Իսկ ծրագիրը փուլային է լինելու:
Նախ՝ կառավարությունը ապահովելու է ենթակառուցվածքների վերականգնումը, մասնավորապես նորոգվելու են այգու հարակից երկու փողոցները: Այս աշխատանքները նախատեսում են ավարտել մինչև տարեվերջ:
«Մոտակա ամիսների ընթացքում ակնկալում ենք պետության հետ աշխատել այգուն ուղղված հասարակական ենթակառուցվածքների վերականգնման ու բարեկարգման ծրագրով, ինչի որոշ հատված, ամենայն հավանականությամբ, մինչև այս տարեվերջ ակնկալում ենք ավարտել: Ծրագիրը չի հետաձգվել, ամեն ինչ պլանով ընթանում է: Հուսամ՝ այդպես էլ կշարունակվի:
Նախատեսում ենք, որ այգու բացումը փուլային կլինի: Դեռ ոչինչ չխոստանալով, բայց հույս ունենք, որ եթե այսպես ամեն ինչ լավ գնա, ապա 2021թ. ամառը որոշակի մի փուլ արդեն կտեսնենք»,- ասել է IDEA հիմնադրամի Գյումրու Բարեկամության այգու ծրագրի ղեկավար Ելենա Մուրադյանը:
Այսօր հրավիրված հանրային քննարկումը նվիրված էր ծրագրի արդյունքում շրջակա միջավայրի վրա ակնկալվող ազդեցություններին: Հանրային քննարկման սակավաթիվ մասնակիցներից, որոնց թվում էին քաղաքի գլխավոր ճարտարապետը, քաղաքաշինության բաժնի պետը և քաղաքապետարանի այլ ներկայացուցիչներ, ծրագրի ղեկավարին հարց ուղղել է միայն Հայաստանի էլցանցեր ընկերության ճարտարագետը:
Այգու տարածքով անցնում է «Գյումրի» բժշկական կենտրոնի մալուխային գիծը, որը տեղափոխելու անհրաժեշտություն է առաջացել:
Ըստ ծրագրի ղեկավարի՝ նախագծային աշխատանքներում նախատեսված են առաջարկներ մալուխային գծի տեղափոխության վերաբերյալ: