Ադրբեջանական Trend գործակալության փոխանցմամբ` ԵԽԽՎ-ում Ադրբեջանի պատվիրակության ղեկավար Սամեդ Սեիդովը կարծիք է հայտնել, թե Աստանայում կայանալիք ԵԱՀԿ գագաթնաժողովին ղարաբաղյան հակամարտության կարգավորման պատասխանատվությունը կախված է Հայաստանից։ «Ղարաբաղյան հակամարտության հարցում որոշակի առաջխաղացման հասնելու հնարավորությունը կախված է Հայաստանի դիրքորոշումից»,- նշել է ԵԽԽՎ-ում Ադրբեջանի պատվիրակության ղեկավար Սամեդ Սեիդովը։ Նա նշել է, թե Ադրբեջանի դիրքորոշումը ԼՂ հարցում հայտնի է միջազգային հանրությանը: Այժմ Հայաստանի կողմից քայլեր ձեռնարկելու պատրաստակամության խնդիրն է»: Սեիդովի մատուցմամբ` Հայաստանի դիրքորոշումը «շարունակում է ապակառուցողական մնալ»:
Հիշեցնենք, որ ԵԱՀԿ գագաթնաժողովը տեղի կունենա Աստանայում դեկտեմբերի 1-2-ը, որտեղ կհավաքվեն կազմակերպության 56 անդամ երկրների ղեկավարներ, վարչապետեր, ԵԱՀԿ 12 գործընկեր երկրների, ինչպես նաեւ 68 միջազգային կազմակերպությունների ղեկավարներ։ ԵԱՀԿ վերջին գագաթնաժողովը տեղի է ունեցել 1999 թվականին Ստամբուլում: