Ալվինա Գյուլումյանը չի կարող կատարել ՍԴ նախագահի լիազորությունները, քանի որ նրա լիազորությունները նույնպես այսօրվանից դադարել են: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Հովիկ Աղազարյանը՝ անդրադառնալով ՍԴ-ից հնչող հայտարարություններին, որ Հրայր Թովմասյանը և ՍԴ անդամ Արևիկ Պետրոսյանը այսօրվանից արձակուրդ են գնացել, իսկ ՍԴ նախագահի լիազորությունները պետք է կատարի Ալվինա Գյուլումյանը:
Ինչ վերաբերում է նրան, որ ՍԴ անդամները պնդում են, որ շարունակելու են աշխատել ՍԴ-ում, Աղազարյանն ասաց. «Իրենք իրենց ճակատագրի տերը չեն: Եթե իրենք լինեին իրենց ճակատագրի տերը, եթե հիշում եք, մի քանի ամիս առաջ համապատասխան օրենք ընդունեցինք վաղաժամկետ կենսաթոշակի անցնելու վերաբերյալ: Դա գեղեցիկ հնարավորություն էր իրենց համար, որ մարդիկ սոցիալապես ապահովված գնան հանգստի և օգտագործեն իրենց գիտելիքներն այլ բնագավառում՝ գիտամանկավարճական, կրթական: Իրենք հրաժարվեցին դրանից»:
Հարցին, թե այդ դեպքում ով է նրանց ճակատագրի տերը, ԱԺ պատգամավորը պատասխանեց. «Նրանց ճակատագրի տերը Ռոբերտ Քոչարյանն ու Սերժ Սարգսյանն են և նրանց շուրջ ֆռֆռացող փսևդո քաղաքական գործիչները»: