Ռոբերտ Քոչարյանի պաշտպանական թիմը հետ է վերցրել ՍԴ ուղարկված դիմումը: Երկրորդ նախագահի պաշտպանները հայտարարել են, թե դա անում են խորհրդարանական ուժերից մեկի հայտարարությունից հետո, որը ՍԴ կազմի վերաբերյալ ԱԺ հայտնի օրենսդրական փոփոխությունների առումով ՍԴ դիմելու և այդպիսով դրանք կասեցնելու ընդդիմադիր պահանջներին ի պատասխան ասել էր, թե կմիանա Քոչարյանի գործով վճռից հետո: Հասկանալի է, որ խոսքը «Լուսավոր Հայաստան»-ի մասին է: ԼՀԿ-ն չէր միացել ԲՀԿ ստորագրահավաքին, որով փորձ էր արվելու կասեցնել ՍԴ կազմի փոփոխության խորհրդարանական գործընթացը: Փոփոխությունը հրապարակվել է պաշտոնական տեղեկագրում և ուժի մեջ կմտնի հունիսի 26-ի 00.01 րոպեից, այսինքն՝ կեսգիշերից: Դրանից ժամեր առաջ, փաստորեն, Ռոբերտ Քոչարյանի փաստաբանները հետ են վերցնում դիմումն ու դիմում «Լուսավոր Հայաստան»-ին՝ դե, միացեք, եթե խնդիրը Քոչարյանի գործն էր: Ինչ խոսք, հնարամիտ քայլ է: Առավել ևս, որ ՍԴ կազմի փոփոխության պարագայում Ռոբերտ Քոչարյանի պաշտպանական թիմը Սահմանադրական դատարանում պաշտպանություն գտնելու հույս, իհարկե, չի ունենա, օբյեկտիվորեն: Ի վերջո, դա է նաև քաղաքական մեծամասնության քայլի տրամաբանության մի զգալի մասը:
Ըստ այդմ, երկրորդ նախագահը չի կորցնում ոչինչ՝ հետ վերցնելով դիմումը: Իսկ ի՞նչ է անելու «Լուսավոր Հայաստանը»: Մնացած մի քանի ժամում միանալո՞ւ է ԲՀԿ-ին, թե՞ այժմ պետք է այլ բացատրություն կամ պատճառաբանություն, թեև հնարավոր է գուցե նաև այդպիսին կարող է լինել ժամանակը: Ընդհանուր առմամբ, հարցն, անշուշտ, ԼՀԿ քաղաքական դիրքը չէ, դա մանր հարց է այն լայն գործընթացում, որ տեղի է ունենում Հայաստանում: Իսկ տեղի է ունենում ներքաղաքական ուժերի մեծ վերախմբավորում և ուժերի հարաբերակցության փոփոխություն: Ըստ էության պետք է արձանագրել, որ Հայաստանում քաղաքական խաղից դուրս է մնացել խորհրդարանական երեք ուժերից երկուսը: Այդ հանգամանքը արձանագրեց նաև Նիկոլ Փաշինյանը ԱԺ ամբիոնից հնչած ելույթում: Գործնականում, Հայաստանում մի իրավիճակ է, երբ խորհրդարան՝ դասական կամ «կլասիկ» իմաստով, չկա, այնտեղ մեկ ուժ է՝ կառավարող մեծամասնությունը: Գլխավոր անորոշությունն, անշուշտ, արտախորհրդարանական դաշտում է, որտեղ էլ տեղի է ունենում հարաբերություն պարզելու և հաջորդ ընտրությունից առաջ դիրքեր ձևավորելու, կամ յուրօրինակ առումով քաղաքական դիրքորոշման ընտրության գործընթացը: