Այսօր՝ հունիսի 24-ին, Ազգային ժողովում հրավիրվել է արտահերթ նիստ: Այժմ շարունակում է քննարկվել 2019թ. պետական բյուջեի կատարման տարեկան հաշվետվությունը:
«Լուսավոր Հայաստան» խմբակցության ղեկավար Էդմոն Մարուքյանը հիշեցրեց, որ նախորդ տարիներին եթե բյուջեի կատարողականը չէր հաստատվում, կառավարությունը ցրվում էր, իսկ հիմա նման բան չկա. «Այս տարի կատարողականը քննարկում ենք երկու խմբակցությունով, և քաղաքական մեծամասնությանը չի հետաքրքրում, երբ խմբակցությունը բոյկոտում է»:
Նա բացատրեց, թե ինչ է նշանակում բյուջեի թերակատարում. «Փողը հավաքվել է, բայց այս մարդիկ չեն կատարել ծրագրերը: Դուք այդ փողը չեք կարողացել լավ ծախսել, որ ժողովրդի համար լավ լինի»:
Մարուքյանի խոսքով` այսօր առողջապահական, սոցիալական, տնտեսական ճգնաժամ է, որին գումարվել է նաև քաղաքական ճգնաժամը. «Հիմա վատ է վիճակը, ապագայում ավելի վատ կլինի: Իսկ իշխանությունն ամեն ինչ անում է ընդդիմությանը լռեցնելու համար: Իմ վրա հարձակվում եք, մյուս ֆրակցիայի խմբակցության վրա գործ եք հարուցում, հետո դատարանը բաց է թողնում: Իշխանությունը զբաղված է ընդդիմախոսներով, «Հրապարակի» լրագրող Էդիկ Անդրեասյանը վարչապետի մասին հոդված գրելու համար հրավիրվել է ոստիկանություն քրեական հետախուզություն: ՏՄՊՊՀ-ն զբաղված է թերթերով: Պարոն վարչապետ, երբ դուք եղել եք թերթի խմբագիր, ՏՄՊՊՀ-ն դիմե՞լ է ձեզ»:
Նա հավելեց, որ «Լուսավոր Հայաստանը» թերակատարված բյուջեին դեմ է քվեարկելու. «Զբաղվեք մարդկանց կյանքը լավը դարձնելով, ոչ թե տեռորի ենթարկելով: Դրանով հեռու չեք գնա, տեսել եք` դրա վերջն ինչ է եղել»:
Մանրամասները՝ տեսանյութում:
