Սահմանադրական դտարանի շուրջ ծավալվող իրադարձությունները շարունակում են փոթորկած պահել հանրային կյանքը: ՀՀ նախագահ Արմեն Սարգսյանն արդեն ստորագրել է մի շարք օրենքներ, այդ թվում նաև սահմանադրական փոփոխությունների մասին նախագիծը: Խորհրդարանի ընդունած Սահմանադրության փոփոխությունները կարող են կյանքի կոչվել 7-օրյա ժամկետում ԱԺ նախագահի կողմից հրապարակելուց հետո:
ԲՀԿ-ն Սահմանադրական փոփոխությունների գործընթացը որակեց որպես հաշվեհարդար ՍԴ անդամների նկատմամբ և բոյկոտեց արտահերթ նստաշրջանը, և այսօր ստորագրահավաք էր կազմակերպել փոփոխությունների հարցով ՍԴ դիմելու համար: «Լուսավոր Հայաստան»-ը չի միացել այդ նախաձեռնությանը, ընտրել է երրորդ ճանապարհ. Էդմոն Մարուքյանն այսօր հայտարարել է, որ Սահմանադրական դատարան կդիմեն միայն հուլիսի 7-ին երկրորդ նախագահ Ռոբերտ Քոչարյանի գործով ՍԴ-ում կայանալիք նիստից հետո։
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Նիկոլայ Բաղդասարյանը, վերլուծաբան Գոռ Մադոյանը և քաղաքագետ Սարո Սարոյանը:
Նիկոլայ Բաղդասարյանի խոսքով՝ ԲՀԿ նախաձեռնությանը «Լուսավոր Հայաստան»-ի միանալը իրավական տեսանկյունից որևէ բան չէր փոփոխի. «Եթե ԲՀԿ անդամները կարծում են, որ իրենց դիմումը հիմնավոր է, կարող էին դիմել ՍԴ»:
«ԲՀԿ-ի քաղաքականությունը միտված էր նրան, որ Ռոբերտ Քոչարյանին ինչ-որ ձևով հետ բերեն քաղաքական դաշտ,- նշեց «Իմ քայլ»-ի պատգամավորը, -նրանց հույս ունեին, որ եթե Վենետիկի հանձնաժողովը հօգուտ Քոչարյանի եզրակացություն կայացներ և ՍԴ այս կազմը պահպանվեր, ՍԴ-ն հակասահմանադրական կճանաչեր 301-րդ հոդվածը»:
Գոռ Մադոյանի դիտարկմամբ՝ ԼՀԿ-ն և ԲՀԿ-ն անընդհատ խոսում էին հեղափոխության իրականացման քայլերից, բայց ընդդիմանում են. «Ընտրել են անպատասխանատու տարբերակ՝ խոսել փոփոխություններից, բայց խոչընդոտել փոփոխությունների իրականացումը»:
«ԼՀԿ-ն և ԲՀԿ-ն իրենց շահերից ելնելով են քայլեր ձեռնարկում»,- նշեց Սարո Սարոյանը՝ հավելելով, որ ընտրված գործիքակազմը խնդրահարույց է:
Մանրամասն՝ տեսանյութում: