Գերմանական E.ON Ruhrgas ընկերությունը որոշում է կայացրել դուրս գալ ռուսական նավթագազային հսկա Գազպրոմ ընկերությունից: Այս մասին հայտնում է ռուսական Коммерсант թերթը: Գերմանական ընկերությանն է պատկանում բաժնետոմսերի 3,5%-ը, որի գինն այս պահին կազմում է $4,5 մլրդ:
Գերմանացիները հայտնել են, որ այս քայլով փորձում են բարելավել ընկերության ֆինանսական վիճակը: E.ON Ruhrgas-ը այս պահին գտնվում է շատ ծանր վիճակում, և Գազպրոմի բաժնետոմսերի վաճառքը թույլ կտա ընկերությանը փակել $1,5 մլրդ պարտքը:
Գազպրոմից հայտնել են, որ այդ բաժնեմասի հավանական գնորդը կլինի ռուսական Վնեշէկոնոմ բանկը, որին արդեն պատկանում է Գազպրոմի բաժնետոմսերի 2%-ը:
Գերմանական ընկերության բաժնեմասի վաճառքը քննարկվում է ամենաբարձր մակարդակով: Հավանաբար այն կքննարկվի այս շաբաթվա վերջին, երբ Գերմանիա կայցելի Ռուսաստանի Դաշնության վարչապետ Վլադիմիր Պուտինը` հանդիպելու Գերմանիայի կանցլեր Անգելա Մերկելին: