Նախօրեին Ազգային ժողովը երկրորդ ընթերցմամբ և ամբողջությամբ ընդունեց Սահմանադրական փոփոխությունների նախագիծը, որով առաջարկվում է փոխարինել Սահմանադրական դատարանի նախագահին և ընդհանուր տևողությամբ ոչ պակաս, քան 12 տարի պաշտոնավարած Սահմանադրական դատարանի անդամներին: Խորհրդարանի որոշումից հետո տարբեր ուժեր հանդես եկան հայտարարություններով՝ մասնավորապես նշելով, որ եթե ԱԺ-ն այդ փոփոխությունների փաթեթը չի ուղարկում ՍԴ, ապա գործընթացը չի կարող իրավաչափ լինել: ԲՀԿ-ն և ԼՀԿ-ն ԱԺ արտահերթ նիստին չէին մասնակցում. ԼՀԿ-ն համարում է, որ անազնիվ գործընթաց է տեղի ունենում, ԲՀԿ-ն տեղի ունեցածը որակում է որպես քաղաքական հաշվեհարդար:
Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ Գերագույն խորհրդի նախկին պատգամավոր Ազատ Արշակյանը, վերլուծաբան Աղասի Մարգարյանը և «Հանուն Հանրապետության» նախաձեռնության անդամ, քաղաքագետ Ռոբերտ Ղևոնդյանը:
«Հեղափոխությունը հաշվեհարդար է. հեղափոխությունը քաղաքական ակցիա է և քաղաքական հակառակորդի նկատմամբ կիրառվում է ուժ կամ ուժի սպառնալիք: Մեզ մոտ բռնություն չկիրառվեց, ընդամենը ուժի սպառնալիք եղավ և թավշյա հեղափոխություն տեղի ունեցավ: Այժմ ձեռքի տակ է ԲՀԿ-ի ընտրակաշառքի փաստաթղթերի տրցակը, բնական է, որ զավթիչները իշխանությունը չեն հանձնելու, հեղափոխությունը քաղաքական հակառակորդին տապալելու գործընթաց է, այն չի ավարտվել, շարունակվում է… Այսօրվա աշխարհակարգը կառուցված է Նյուրնբերգյան դատավարությունների վրա… Հեղափոխության ժամանակ պետք է ՍԴ-ն փակվեր, և պետք էր զտում իրականացնել»,- նշեց Ազատ Արշակյանը:
Ռոբերտ Ղևոնդյանի դիտարկմամբ՝ ԲՀԿ-ի և ԼՀԿ-ն պարտավոր էին մասնակցել քննարկմանը և հայտնել իրենց դիրքորոշումը. «Սա ոչ թե քաղաքական դեմարշ էր, այլ քաղաքական անմեղսունակություն: Քննարկմանը չմասնակցելը և մարտից հետո բռունցքներ թափ տալը պատիվ չի բերում ոչ մի քաղաքական ուժի»:
«ԲՀԿ-ն քաղաքական չէ, այնտեղ ճորտատիրական համակարգ է տիրում, կամավոր ճորտությունն ավելի վատ է, երբ որ մարդն ինքն է հրաժարվում իր ազատություններից, իսկ ԲՀԿ-ում ճորտ մարդիկ կան, որոնք «ղազագրեր» են ստորագրել՝ իրենց զրկելով ԱԺ պատգամավորի ազատ լնելու և խոսքի ազատության իրավունքից… Մարդիկ բռնվել են «ղազագրի» վրա, բայց հրաժարականներ չեղան. ԱԺ-ն պետք է լուծարվեր: ԲՀԿ-ի քայլը քաղաքական մարմնավաճառություն է»:
Աղասի Մարգարյանի դիտարկմամբ՝ խորհրդարանական երկու ընդդիմադիր ուժերն իրենց հրապարակային հայտարարություններում նշում են, որ իրենք որևէ առնչություն չունեն մերժված ուժերի հետ, բայց այդ բևեռն ամբողջությամբ, ըստ էության, մերժված ուժերի հավաքույթ է: Վերլուծաբանի խոսքով՝ այդ բևեռը միտումնավոր և դրսից ուղղորդված կերպով փչացնում է արժեքները. «Այնտեղ հավաքված են այնպիսի ուժեր, որոնց բովանդակությունը քաղաքական առք ու վաճառքն է եղել տասնամյակներ շարունակ: Այդ ուժերի միջև հնարավոր չէ, որ կոնսոլիդացիա տեղի ունենա»:
Մանրամասն՝ տեսանյութում: