Ազգային ժողովի կողմից Սահմանադրական փոփոխությունների նախագծի ընդունմամբ դադարեցվում են ՍԴ անդամներ Ալվինա Գյուլումյանի, Ֆելիքս Թոխյանի և Հրանտ Նազարյանի լիազորությունները, իսկ Հրայր Թովմասյանը դադարում է լինել ՍԴ նախագահ, նա կշարունակի պաշտոնավարել որպես ՍԴ դատավոր: Թեմայի շուրջ «Առաջին լրատվական»-ը զրուցել է ԱԺ «Իմ քայլը» խմբակցության պատգամավոր Վահագն Հովակիմյանի և փաստաբան Արա Ղարագյոզյանի հետ:
«Սահմանադրության փոփոխությունները անձերին չի վերաբերում,- նշեց Վահագն Հովակիմյանը,- Սահմանադրական դատարանը պետք է ամբողջությամբ համահունչ լինի Սահմանադրության 7-րդ գլխի պահանջներին, դա ենթադրում է, որ պետք է դադարեցվեն 12 տարի պաշտոնավարած ՍԴ անդամների լիազրությունները, նրանք երեքն են, մյուս չորսը կշարունակեն պաշտոնավարել մինչև 12 տարին լրանալը»:
Արա Ղարագյոզյանի գնահատմամբ՝ Ազգային ժողովի նախաձեռնած՝ սահմանադրական փոփոխություններ իրականացնելու գործընթացը իրավաչափ է. «ԱԺ-ի քայլը օրինական է: Նախկին ռեժիմի ներկայացուցիչները, այդ թվում նաև ՍԴ երեք դատավորները և Հրայր Թովմասյանը այս քայլը համարել են հակասահմանադրական, քանի որ իրենք զրկվում են պաշտոններից»:
«Հրայր Թովմասյանը ՍԴ նախագահ է դարձել կեղծարարության արդյունքնում: Հրայր Թովմասյանը Ազգային ժողովի նախաձեռնած գործընթացն այսօր որակեց որպես ամոթալի, բայց նա թող հետ նայի՝ կտեսնի, թե ինչ ամոթալի քայլեր է արել, երբ արդարադատության նախարար էր կամ պատգամավոր էր… Ինչ է արել նա, երբ քրեական ենթամշակույթ էր տիրում ՔԿՀ-ներում, և ընդհանուր առմամբ ինչ որոշումներ է ընդունել որպես ՍԴ նախագահ՝ նախկին իշխանությունների շահերն ամրապնդելու համար»,- նշեց փաստաբանը:
Մանրամասն՝ տեսանյութում: