Երևանում հարկ վճարողների սպասարկման երրորդ նորաոճ կենտրոնն է բացվել Էրեբունու հարկային տեսչությունում, որի աշխատանքներին ծանոթանալու նպատակով նորաբաց կենտրոն էր այցելել Պետական եկամուտների կոմիտեի նախագահ Գագիկ Խաչատրյանը: Կենտրոնի շինարարական աշխատանքները սկսվել էին այս տարվա ապրիլից:
ՊԵԿ լրատվական ծառայության համաձայն՝ Կոմիտեի նախագահը հարկային տեսչությունների առջև խնդիր է դրել՝ նմանատիպ սպասարկման կենտրոնների ստեղծման հիմնական նպատակադրումը շատ հստակ պետք է լինի. հասնել նրան, որ, անկախ տարածաշրջանային պատկանելությունից, հնարավոր լինի ՊԵԿ-ի ցանկացած սպասարկման կենտրոնում՝ գրասենյակում, իրականացնել ընթացակարգեր՝ ինչպես հարկային, այնպես էլ մաքսային ծառայությունների հետ կապված: Այսինքն, օրինակ՝ Եղեգնաձորի հարկային տեսչությունում գրանցված հարկատուն հնարավորություն ունենա, անհրաժեշտության դեպքում, ասենք՝ Էրեբունու հարկային տեսչության սպասարկման կենտրոն մտնել և իրեն անհրաժեշտ հաշվետվություններն այնտեղ հանձնել կամ Բագրատաշենի մաքսակետի հետ գործով առնչվող անձը կարողանա նույն հարկային գրասենյակից իրականացնել իրեն անհրաժեշտ գործառույթներն՝ առանց Բագրատաշեն այցելելու: Արդյունքում մեկ միասնական տեղեկատվական համակարգը հնարավոր կդարձնի Պետական եկամուտների կոմիտեի հետ կապված բոլոր գործառույթներն իրականացնել ցանկացած տարածքային հարկային գրասենյակից:
Ըստ ՊԵԿ տեղեկատվական տեխնոլոգիաների վարչության պետ Միքայել Փաշայանի՝ հարկային գրասենյակից օգտվելու նման օրինակ արդեն իսկ կա. Գյումրիում գրանցված հարկ վճարողը Էրեբունու տեսչության սպասարկման կենտրոնից միանգամից իրականացրել է իր հարկային և մաքսային պարտավորությունները:
«Հարկային գրասենյակների միջոցով մեկ տեղեկատվական կետից ՊԵԿ կողմից իրականացվող բոլոր ծառայությունների մատուցումը մեծ քայլ է հարկ վճարողների սպասարկման որակի բարելավման առումով: Նպատակն է՝ էլեկտրոնային կառավարման և կապուղիների զարգացման արդյունքում բոլոր տեսչություններում ունենալ նմանատիպ հարկային գրասենյակներ»,- ընդգծել է Մ. Փաշայանը:
Ներկայում աշխատանքներ են տարվում Նոր Նորքի, Շենգավիթի, Քանաքեռ-Զեյթունի հարկային տեսչություններում հարկ վճարողների սպասարկման կենտրոններ բացելու ուղղությամբ: