Ազգային ժողովն այսօր 89 կողմ ձայնով առաջին ընթերցմամբ ընդունեց մի խումբ պատգամավորների կողմից ներկայացված Սահմանադրության փոփոխության մասին օրինագիծը: Արտահերթ այս գործընթացը շատ քննադատվեց, այդ թվում նաև խորհրդարանական ընդդիմության կողմից. «Բարգավաճ Հայաստան» և «Լուսավոր Հայաստան» կուսակցությունները չեն մասնակցել նիստին: ԲՀԿ-ն պնդում է, որ իշխանության թիվ մեկ խնդիրը այս իրավիճակում շարունակում է մնալ ՍԴ-ն, և իշխանությունը հետևողականորեն հաշվեհարդար է տեսնում ՍԴ անդամների նկատմամբ, ԼՀԿ-ն պնդում է, որ իշխանության գործողություններն ազնիվ չեն:
Թեմայի շուրջ «Առաջին լրատվական»-ի հետ քննարկմանը մասնակցեցին «Քաղաքացիական պայմանագիր» կուսակցության հասարակայնության հետ կապերի պատասխանատու Վահագն Ալեքսանյանը, «Հայ կառուցողական կուսակցության» նախագահ Անդրիաս Ղուկասյանը և «Քաղաքացու որոշում» կուսակցության անդամ Նարեկ Ներսիսյանը:
«Ակնհայտ է, որ ՍԴ հարցը հանգուցալուծվելու կարիք ունի, և այն, ինչ առաջարկվեց այսօր ԱԺ-ում, կոմպրոմիսային տարբերակ է, ես համարում եմ, որ այն թերի փաստաթուղթ է: Բացի նրանից, որ Սահմանադրությունն ունի բազմաթիվ թերություններ, թերի է եղել նաև Սահմանադրության ընդունման գործընթացը»,- նշեց Անդրիաս Ղուկասյանը՝ հավելելով՝ այն, ինչ ունենք, ցածր իրավաբանական մակարդակ ունեցող փաստաթուղթ է:
Նարեկ Ներսիսյանի դիտարկմամբ՝ կառավարող ուժը նախ և առաջ պետք է ներկայացնի հայեցակարգային մոտեցումներ, թե ինչպիսի ՍԴ է ուզում տեսնել. «Այսինքն ոչ թե կոնկրետ անձերի հետ պետք է կապել սահմանադրական փոփոխությունները, այլ համակարգի: Միանշանակ այսպիսի ՍԴ մեզ պետք չէ, բայց համաձայն չեմ այն գործընթացի հետ, որն իրականացնում է կառավարող ուժը: Իրավական ճանապարհը ճահիճ է և լեգիտիմ չէ, քանի որ բխում է գործող Սահմանադրությունից, առաջնահերթ պետք է լուծել այս Սահմանադրության հարցը»:
««Իմ քայլը» դաշինքը փորձում է Սահմանադարական դատարանը բերել ժողովրդավարական հուն»,- նշեց Վահագն Ալեքսանյանը: Տարբեր շրջանակների կողմից կոշտ քննադատություն էր հնչում և Սահմանադրության փոփոխության հետ կապված այս գործընթացը համարվում էր հակաիրավական. անդրադառնալով այս դիտարկմանը և հարցին, թե ինչու է աղմկում անցյալը, Վահագն Ալեքսանյանը պատասխանեց.«Որովհետև շատ լավ հասկանում են, որ իրենցից կազմված վերջին կառույցը փլուզվում է և շուտով այն կվերաձևավորվի ժողովրդավարական մոդելով»:
Մանրամասն՝ տեսանյութում: