Նախկին իշխանություները խորը ցնցումների մեջ են գտնվում այն կապակցությամբ, որ կորցնում են իրենց վերահսկողությունը իրենց վերջին բաստիոնի՝ ՍԴ-ի նկատմամբ: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արուսյակ Ջուլհակյանը՝ անդրադառնալով նրան, որ ընդդիմադիր գործիչները հայտարարում են, որ Վենետիկի հանձնաժողովի կարծիքը հակասում է ՍԴ-ի վերաբերյալ իշխանությունների ներկայացրած նախագծին:
«Այո, վերջին օրերին, չնայած նրան, որ Վենետիկի հանձնաժողովի կարծիքը դեռևս հրապարակված չէր, արդեն մերժվածների խմբակից որոշ ներկայացուցիչներ կոկորդ էին պատռում առավոտից երեկո՝ խոսելով այն մասին, Վենետիկն այս է ասում, այն է ասում: Ասյ առնչությամբ ես արձանագրեմ, թե ինչ է ասել Վենետիկի հանձնաժողովը: Նախ մի քանի օր առաջ Վենետիկի հանձնաժողովի նախագահը հստակ արձանագրել է, որ Հայաստանը հեռացրել է օլիգարխիկ ռեժիմ: Այս պնդմանը մերժվածները որևէ կերպ չեն ուզում անդրադառնալ, թե այդ ի՞նչ օլիգարխիկ ռեժիմ նկատի ուներ հարգարժան Ջիանի Բուքիքիոն:
Երկրորդ հերթին Վենետիկի հանձնաժողովը մի շարք կարևոր արձանագրություններ է արել՝ նշելով, ՍԴ կազմի փոփոխությունը, այսինքն այն փոփոխությունները, որ մենք հիմա անում ենք, հետապնդում է լեգիտիմ նպատակ»,-ասաց նա: