Քաղաքական իմաստով Ռոբերտ Քոչարյանի ազատությունը ստեղծում է նոր իրավիճակ: Մասնավորապես այն սրում է ներհասարակական տրամադրությունները, բևեռացնում դրանք, թեև մինչ այդ էլ կարծես թե սրության ու բևեռացման պակաս չէր զգացվում Գագիկ Ծառուկյանի շուրջ իրադարձությունների բերումով: Թեմայի շուրջ «Առաջին լրատվական»-ը զրուցել է քաղաքագետ, «Ժողովրդավարական համախմբում» նախաձեռնության համահիմնադիր Սուրեն Պետրոսյանի և վերլուծաբան Արեգ Քոչինյանի հետ:
Սուրեն Պետրոսյանի դիտարկմամբ՝ հեղափոխությունից անմիջապես հետո Գագիկ Ծառուկյանը իշխանության կողմից լեգիտիմացվեց, օլիգարխից փոխակերպվեց որպես խոշոր սեփականատեր, լեգիտիմացվեց նրա ներկայությունը քաղաքական դաշտում. «Խնդիրները այս հարթությունում պետք է դիտարկել: Չեմ կարծում, որ ՀՀ-ում կա մարդ, որը կասկածում է Ծառուկյանի ներգրավվածությանը ընտրակաշառքների և այլնի մեջ. ի՞նչ նպատակ ուներ նրա լեգիտիմացումը, իրավիճակային խնդի՞ր էր լուծվում իշխանության ինստիտուցիոնալացման համար, թե՞ երկարաժամկետ խնդիր էր լուծում: Մենք ունենք խնդիր. չենք կարողանում երկարաժամկետ կառավարում իրականացնել: Հեղափոխությունից հետո մեզ մոտ չի գործել պակտ. քաղաքական խառնաշփոթ է և անորոշություն»:
Արեգ Քոչինյանի դիտարկմամբ՝ դեռևս գտնվում ենք անցումային պատմակարգում, իշխանության վերաբաժանման խնդիրները դեռևս ավարտված չեն, այդ իսկ պատճառով չի կարող պակտ տեղի ունենալ:
«Ծառուկյանը օգտագործվում է. ունենք սողացող հեղաշրջման փորձ,- նշեց Արեգ Քոչինյանը:- Որոշակի ուժային կենտրոն է ձևավորվում, դեռևս պարզ չէ՝ ով է լինելու «առաջին ջութակը», բայց այդ ուժային կենտրոնը ոչնչով չի տարբերվում նախկինում գոյություն ունեցած հանցավոր ռեժիմից, ըստ էության, նույն հանցավոր ռեժիմն է՝ նույն ֆինանսներով, նույն արժեհամակարգով: Եվ այս ուժային կենտրոնի հետ պակտի կնքումը վտանգավոր է»:
Մանրամասն՝ տեսանյութում: