Վերաքննիչ դատարանը հունիսի 18-ին կայացրել է երկրորդ նախագահ Ռոբերտ Քոչարյանին 2 միլիարդ դրամ գրավի դիմաց կալանքից ազատելու մասին որոշում, փոխելով նրա խափանման միջոցը: Այդ որոշումը կայացվում է Հայաստանում կարևորագույն, շրջադարձային մի փուլում, երբ կառավարող մեծամասնությունը սուր դիմակայության մեջ է «Բարգավաճ Հայաստան»-ի հետ, և այդ կուսակցությունն էլ հայտարարել է շարժում ծավալելու մասին:
Միաժամանակ, խորհրդարանը տվել է ԲՀԿ նախագահ Գագիկ Ծառուկյանին կալանավորելու թույլտվություն: Ըստ էության ստացվում է, որ տեղի է ունենում փոխանակում՝ Ռոբերտ Քոչարյանը հայտնվում է կալանքից դուրս, Գագիկ Ծառուկյանը՝ կալանատանը: Կա՞ արդյոք ուղիղ կապ այս փոխատեղման մեջ, թե՞ սա զուտ պայմանականություն է:
Արդյոք Ռոբերտ Քոչարյանի վերաբերյալ դատական վճիռը ունի՞ նպատակ որոշակիորեն թուլացնել ներքաղաքական լարումը, այսպես ասած՝ բալանսավորել իրավիճակը: Ինչ խոսք, այստեղ գործ ունենք դատարանի վճռի հետ, ինչը զուտ իրավական տիրույթում է, սակայն օբյեկտիվ ու սուբյեկտիվ հանգամանքների բերումով անպատկերացնելի է, որ Հայաստանում այդօրինակ հնչեղ քաղաքական նշանակության և ընդգրկման գործերով կայացվող դատական վճիռները ընկալվեն զուտ իրավական, դիտարկվելով դատարանի անկախ որոշում: Եվ սա, իհարկե, Հայաստանի խորքային մշակութաբանական խնդիրներից մեկն է, որն, իհարկե, ձևավորվել է քաղաքական ինստիտուցիոնալ համակարգային խնդիրների և արատների հետևանքով: Ու քանի որ հանրային ընկալման մեջ դատարանի վճիռը լինելու է այսպես ասած՝ քաղաքական համատեքստով, ապա դա էլ իր հերթին, բնականաբար, թողնելու է քաղաքական ազդեցություն ու նշանակություն:
Ի վերջո, քաղաքականությունը ձևավորվում է նաև ըստ հանրային ընկալումների և տրամադրությունների, և ոչ միայն ինքն է ձևավորում այդպիսիք: Հետևաբար՝ հանրային ընկալման հանգամանքը, ըստ ամենայնի, ենթադրելու է որոշակի քաղաքական արձագանք երկրորդ նախագահի խափանման միջոցի փոփոխությանը: Այդ իմաստով հատկանշական է, օրինակ, այն, ինչ տեղի ունեցավ 2019-ի մայիսին, երբ փոխվեց նրա խափանման միջոցը: Դա փաստորեն գեներացրեց ներքաղաքական կոշտ աշխուժություն կառավարող ուժի գործողություններում, որոնք բերեցին դատական համակարգում որոշակի վերադասավորումների, մասնավորապես Բարձրագույն դատական խորհրդի կազմի փոփոխության: Ի՞նչ է գեներացնելու Ռոբերտ Քոչարյանի խափանման միջոցի փոփոխությունն այս անգամ: Թե՞ այս անգամ տեղի ունեցող ներքին զարգացումներն ու դրանց արտաքին համատեքստն է «գեներացրել» խափանման միջոցի փոփոխություն և ստեղծել իրավիճակ, երբ առաջացել է Ռոբերտ Քոչարյանի խափանման միջոցի փոփոխության անհրաժեշտություն:
Այդ իմաստով ստեղծվում է բավականին հետաքրքիր պատկեր, այն իրողության ֆոնին, որ ձևավորվել է ԲՀԿ և Գագիկ Ծառուկյանի շուրջ քաղաքական համախմբման տեսքով: ԲՀԿ ներկայացուցիչ Նաիրա Զոհրաբյանը հայտարարել էր, որ բացառվում է գործակցություն նախկինում մերժված որևէ ուժի հետ: Դիտարկվո՞ւմ է այդ շրջանակում երկրորդ նախագահն իր քաղաքական հավակնությամբ, թե՞ ոչ, հարց է, որը դեռևս չի հնչել, թեև ԲՀԿ-ն մշտապես ինքն է հրաժարվել Ռոբերտ Քոչարյանի հետ ասոցացվելուց: Այդպիսով, ներկայումս ԲՀԿ շուրջ արդեն հայտնի կորիզի պայմաններում՝ ՀՅԴ, Արթուր Վանեցյան, մի քանի այլ ուժեր, Ռոբերտ Քոչարյանի խափանման միջոցի փոփոխությունը ստեղծում է «զուգահեռ իրականություն», ստեղծելով բավականին բարդ ու բազմաշերտ իրավիճակ, երբ կողմերը կանգնելու են միմյանց հանդեպ ավելի հստակ դիրքավորվելու անհրաժեշտության առաջ: Ծառուկյանն ու Քոչարյանը «կփոխարինեն» իրար կալանատանը և դրսո՞ւմ, թե՞ Ռոբերտ Քոչարյանը դրսում նոր պայմաններ կդնի Ծառուկյանի և կորիզի առաջ:
