«Օլիգարխիկ համակարգը մեր երկրում կործանարար է եղել և կա: Շատ պարզ է, թե այսօր ինչ է տեղի ունենում մեր երկրում, բայց, չգիտես ինչու, ուշացած է տեղի ունենում»,- «Առաջին լրատվական»-ի հետ զրույցում, անդրադառնալով վերջին շրջանում ներքաղաքական բուռն զարգացումներին, ԲՀԿ շուրջ ծավալվող իրադարձություններին՝ ասաց ռեժիսոր Հրանտ Վարդանյանը: Նա նաև նկատեց, որ այսօր հնչում են կոչեր, բայց առաջարկներ չկան, գաղափարախոսություն չկա:
«Այսօր դավաճանության նման մի բան եմ տեսնում, երկրի հիմքերի հետ են խաղում: Այս գործողություններն ուղղորդված են դրսից և այստեղից արդեն զեկույցներ են տալիս դրսին: Ռուսաստանի համար դժվար է համակերպվել այն մտքի հետ, որ Հայաստանն ուզում է ավելի ինքնիշխան լինել: Ռուսաստանի ներդրած օլիգարխիկ համակարգն այսօր խարխլվում և քանդվում է, և այստեղ հենվելու տեղ չի ունենում, այսինքն՝ այստեղ շահերի խնդիր կա՝ իմպերիայի շահերը ոտնատակ են լինում: Ռուսական իմպերիան այսօր խարխուլ վիճակում է, քանդվում է, իրեն շատ բաներ չի կարողանում թույլ տալ, բայց տեղական «լակեյները» շարունակում են սպասարկել նրա շահերը և ինչ-որ գործողություններ են անում»:
«Գագիկ Ծառուկյանը քաղաքականության մեջ նման է բոքսի տանձիկի, որի վրա պարապում են, այսինքն՝ քաղաքականության մեջ ինչ-որ արվում է, մի Ծառուկյան կա, որին դեմ են տալիս՝ զոհաբերում են,- նշեց ռեժիսորը՝ ընդգծելով, որ հարկավոր է խելքի գալ, այլապես այսպես երկար չի կարող շարունակվել: «Եթե թավիշից բողոքում են, սրա վերջը կարող է լինել կլասիկ հեղափոխությունը, ինչը շատ ծանր կնստի մեր երկրի վրա, առավել ևս նրանց վրա, ովքեր այսօր մութ սենյակում սև կատու են որսում և շարունակում են ջուրը պղտորել»,- նշեց մեր զրուցակիցը:
Մանրամասն՝ տեսանյութում: