Ինչու Ալիևը հրաժարվեց մեկնել Մոսկվա․ այդ որոշումը հարցեր է առաջացնում

«Ես կարծում եմ բավականին հետաքրքրական էր այդ հայտարարությունը, որովհետև կորոնավիրուս տարածված է բոլոր երկրներում, որոնք ղեկավարները հրավերներ են ստացել մասնակցելու այդ շքերթին։ Այդուհանդերձ, Ալիևը հրաժարվեց՝ պատճառաբանելով, որ իրենց մոտ երկարաձգվել է արտակարգ դրությունը։ Տարբեր վարկածներ կարող են լինել դրա հետ կապված։ Մի կողմից տեսանք, որ վերջին շրջանում նաև ռուս-ադրբեջանական սահմանին Դաղստանի կողմից որոշակի խնդիրներ էին առաջացել, մարդիկ չէին կարողանում գնալ Ադրբեջան։ Նույնիսկ բախումներ եղան, որի պատճառով ադրբեջանցիներ սպանվեցին։ Կան որոշակի այդ առումով հարցեր։ Մյուս կողմից, անցած տարվանից խոսվում էր հենց Ալիևի առողջական խնդիրների մասին։ Նա մի քանի ամիս հրաժարվում էր մեկնել միջազգային այցերի»,- «Առաջին լրատվականի» հետ զրույցում ասաց «Իմ քայլը» խմբակցության պատգամավոր Տաթևիկ Հայրապետյանը՝ անդրադառնալով հայտարարությանը, որ Ադրբեջանի նախագահ Իլհամ Ալիևը չի մասնակցի հունիսի 24-ին Մոսկվայում կայանալիք Հաղթանակի շքերթին։